Աշխատանքից ազատվել են Հայաստան-Իտալիա խաղի հեռարձակման խոտանի մեղավորները

«Արմենիա» հեռուստաընկերությունն այսօր հայտարարություն է տարածել, որով ներաղամտություն են հայցում ֆուտբոլասերներից և տեղեկացնում, որ հոկտեմբերի 12-ին կայացած Հայաստան-Իտալիա ֆուտբոլային հանդիպման տեխնիկական խոտանի բոլոր մեղավորները պատժվել են:

Հայտարարությունում մասնավորապես ասված է. «Հարգելի՛ հեռուստադիտողներ և հատկապես ֆուտբոլասերներ, «ՊանԱրմենիան Մեդիա Գրուպի» ղեկավարության անունից ներողամտություն ենք հայցում ֆուտբոլի սիրահարներից «Արմենիա» հեռուստաընկերության եթերով Հայաստան-Իտալիա ազգային հավաքականների հանդիպման հեռարձակման ընթացքում առաջացած տեխնիկական թերությունների համար:

Տեղի ունեցածն ուղիղ եթերի հեռարձակման կազմակերպման բարդ գործընթացի թերացում է, որը վրդովվեցրել է մեզ բոլորիս՝ մեր ազգային հավաքականի երկրպագուներին:

Ձեռնարկվել են խստորոշ և հստակ քայլեր. պատասխանատուները պատժված են, մեղավորներն աշխատանքից ազատված: Կիրառված և սահմանված են բոլոր հնարավոր միջոցները՝ նման բան այլևս չկրկնվելու համար:

Մենք հասկանում ենք Ձեր վրդովմունքը և ավելին, կիսում այն: Քանի որ երկուստեք գնահատում ենք իրավիճակը նմանօրինակ, այս ամենը մեզ վստահություն է ներշնչում, որ մենք նորանոր հնարավորություններ կունենանք ապացուցելու մեր պրոֆեսիոնալիզմը և կարժանանանք Ձեր գոհունակությանը:

Շնորհակալություն, որ մեզ հետ եք»: