Թրամփը կարող է առաջադրվել 2024 թվականի նախագահական ընտրություններում

Համաշխարհային Մամուլ 4 Նոյեմբեր, 2022 16:26

Նոյեմբերի 8-ին ԱՄՆ Կոնգրեսի միջանկյալ ընտրություններում հանրապետականների հավանական հաղթանակից հետո ԱՄՆ նախկին նախագահ Դոնալդ Թրամփը կարող է հայտարարել իր նախագահական արշավի մեկնարկի մասին։ Այս մասին հայտնում է Reuters-ը՝ հղում անելով քաղաքական գործչին մոտ կանգնած աղբյուրներին։

«Կարծում եմ` ինչպես ցեցն է թռչում դեպի կրակը, Թրամփն առաջադրվելու է 2024 թվականին։ Հայտարարելով արշավի մեկնարկի մասին մինչև Գոհաբանության օրը (նոյեմբերի 25-խմբ.)՝ նա մեծ առավելություն կստանա»,- ասել է գործակալության աղբյուրներից մեկը։

Առաջիկա շաբաթների հայտարարությունը կարող է նաև շփոթեցնել հանրապետականների առաջադրման հավանական մրցակիցներին, ասել են Reuters-ի աղբյուրները: Սակայն աղբյուրները չեն բացառել, որ գուցե նախկին նախագահը դեռ կարող է հետաձգել որոշումը կամ փոխել այն։ Միևնույն ժամանակ, The Washington Post-ը, հղում անելով Թրամփին մոտ կանգնած աղբյուրներին, գրում է, որ նախկին նախագահն արդեն սկսել է իր խորհրդականների հետ քննարկել նախընտրական արշավում իր պոտենցիալ օգնականների թեկնածությունները։

Պաշտոնական հայտարարությունից առաջ Թրամփը հյուրընկալել է նահանգի ներկայացուցիչներին և Հանրապետական ազգային կոմիտեի անդամներին Ֆլորիդայում գտնվող Մար-ա-Լագոյի իր կալվածքում, գրում է թերթը: Թերթի աղբյուրները հայտնում են, որ հենց Մար-ա-Լագոյում է Թրամփը նախատեսում հայտարարել իր նախագահական հայտի մասին։

Թրամփը Միացյալ Նահանգների նախագահն էր 2017-2020 թվականներին։ 2020 թվականի հունվարին նա ընտրություններում պարտվեց գործող նախագահ Ջո Բայդենին։

Թրամփը չի ընդունել պարտությունը և փորձել է ընտրությունների արդյունքները վիճարկել դատարանում։ Սակայն ԱՄՆ Գերագույն դատարանը մերժել է նախկին նախագահի հայցը քվեարկության արդյունքների վերանայման վերաբերյալ։ Քաղաքական գործիչը երբեք չի բացառել, որ կրկին կառաջադրվի 2024 թվականին։

Բայդենը հոկտեմբերի սկզբին ասել էր, որ վստահ է, որ 2024 թվականի նախագահական ընտրություններում կրկին կհաղթի Թրամփին։ Միաժամանակ, պետության ղեկավարն ասել է, որ դեռ չի որոշել՝ կմասնակցի՞ արդյոք ընտրություններին։ Նախագահը վստահեցրել է, որ այս մասին կորոշի Կոնգրեսի ընտրություններից հետո։