Երբ չես կարող չնկարել

Արցախյան շարժում, Սպիտակի երկրաշարժ, ճգնաժամ և Ղարաբաղյան պատերազմ. այսպիսին էր Հայաստանի Հանրապետության անկախության ձեռքբերման ուղին: Լուսանկարիչ Ռուբեն Մանգասարյանի «Անկախության ճանապարհին» լուսանկարների շարքն ամփոփում է 1988-1994 թվականների այս բոլոր կարևորագույն իրադարձությունները՝ ներկայացնելով վավերագրական ահռելի արժեք:

Երեկ՝ ժամը 17.00-ին Նորարար-փորձարարական արվեստի կենտրոնում (ՆՓԱԿ) բացվեց հայրենիքում Ռուբեն Մանգասարյանի առաջին ցուցահանդեսը: Այս փաստագրական լուսանկարները հրապարակվել են համաշխարհային հայտնի լրատվական գործակալությունների և պարբերականների կողմից՝ Արցախյան պատերազմի դժվարին տարիներին տեղեկատվություն հաղորդելով մարտական գործողությունների և խաղաղ բնակչության մասին: Լուսանկարները ցուցադրվել են Ֆրանսիայի մի քանի քաղաքներում՝ տպագրվելով լուսանկարչական ալբոմում, իսկ «Ղարաբաղյան շարքը», որ շատերը համարում են նրա ամենահասուն աշխատանքը, թեժ քննարկումների պատճառ է դարձել «ՌԻԱ-Նովոստի» գործակալության՝ Կիևում կազմակերպած ցուցահանդեսի ժամանակ:

Այս ցուցահանդեսը երրորդն է լուսանկարչի մահից հետո: Ռուբեն Մանգասարյանի եղբայրն ասում է, որ իրենք ցանկանում են ստեղծել լուսանկարների մշտական ցուցադրություն: Նա նախատեսում է այդպիսի թանգարան ստեղծել Շուշիում:

Լուսանկարների երևանյան ցուցահանդեսը կազմակերպվել է «Ռուբեն Մանգասարյան մեմորիալ» հիմնադրամի կողմից՝ ՀՀ վարչապետ Տիգրան սարգսյանի բարձր հովանու ներքո՝ նվիրվելով ՀՀ անկախության քսանամյակին:

Ցուցահանդեսը ՆՓԱԿ-ում գործելու է մինչև նոյեմբերի հինգը: