2012թ. գերակա խնդիրները

Դեկտեմբերի 19-ին տեղի ունեցավ ՀՀ տարածքային կառավարման նախարարին կից կոլեգիայի նիստը, որը վարում էր ՀՀ փոխվարչապետ, տարածքային կառավարման նախարար Արմեն Գեւորգյանը: Նիստում քննարկվեցին եւ ի գիտություն ընդունվեցին 2012թ. միջոցառումների ծրագրից բխող ՀՀ տարածքային կառավարման նախարարության, ինչպես նաեւ նախարարության ենթակայության ներքո գործող` Ջրային տնտեսության պետական կոմիտեի եւ Միգրացիոն պետական ծառայության` 2012թ. գերակա խնդիրներն ու միջոցառումները: 2012թ. ՏԿՆ գերակա խնդիրներն են`

. Տեղական ինքնակառավարման մարմինների կողմից իրականացվող ծախսային քաղաքականության ընդհանուր մեթոդաբանության ձեւավորում
. Գործարար միջավայրի բարելավմանն ուղղված՝ տեղական ինքնակառավարման մարմիններ-գործարար հատված հարաբերությունների պարզեցում, հստակեցում եւ գործող ընթացակարգերի բարելավում
. Տարածքային զարգացման հայեցակարգից բխող նոր գործիքակազմի ձեւավորում:

ՏԿՆ առաջին տեղակալ Վաչե Տերտերյանը տեղեկացրեց, որ առաջին գերակայության ուղղությամբ նախատեսվում է ուսումնասիրել ՏԻՄ-երի կողմից իրականացվող ծախսերը, օբյեկտիվ կարիքները եւ դրա հիման վրա, ըստ համայնքների մեծության, մշակել ծախսային կառուցվածքների տիպաբանությունը:
Բացի այդ, կվերանայվեն պետական բյուջեից համայնքներին հատկացվող դոտացիաների սահմանված չափորոշիչները` նվազագույն չափի մասով:

Երկրորդ գերակայության ուղղությամբ մասնավորապես նախատեսվում է մշակել առաջարկությունների փաթեթ, որոնց իրականացման արդյունքում հնարավորինս կպարզեցվեն ՏԻՄ - գործարար հատված հարաբերությունները, կներկայացվեն առաջարկություններ` ՏԻՄ- երից վարչական կախվածության գործոնը էականորեն նվազեցնելու կամ պարզեցնելու ուղղությամբ:

Երրորդ խնդրի` Տարածքային զարգացման հայեցակարգից բխող նոր գործիքակազմի ձեւավորման ուղղությամբ կամբողջացվի մարզերի տնտեսական զարգացման ներուժի գնահատման մեթոդաբանությունը, կհաշվարկվի տարածքներում պետական բյուջեի եւ այլ միջոցների հաշվին կատարվող ներդրումների արդյունավետությունը, առաջարկություններ կներկայացվեն Տարածքային զարգացման հիմնադրամի ձեւավորման մոտեցումների եւ աղբյուրների վերաբերյալ:

Ջրային տնտեսության պետական կոմիտեի նախագահ Անդրանիկ Անդրեասյանի ներկայացմամբ` կոմիտեի 2012թ. գերակա խնդիրները երկուսն են` հանրապետության մի շարք քաղաքների եւ գյուղական բնակավայրերի ջրամատակարարման բարելավում եւ «Ոռոգման համակարգերի վերականգնման հրատապ ծրագրով» ՀՀ 2012 թվականի պետական բյուջեով նախատեսված շուրջ 50 կմ ոռոգման ջրանցքների վերականգնում: Առաջին գերակայության ուղղությամբ մասնավորապես աշխատանքներ կկատարվեն մատակարարվող խմելու ջրի որակի ապահովման, ջրի կորուստների կրճատման, ջրամատակարարման տեւողության աստիճանական ավելացման ուղղությամբ, խմելու ջրամատակարարման եւ ջրահեռացման ոլորտներում կիրականացվեն շուրջ 450 կմ ջրագծերի եւ ջրանցքների վերանորոգման ու կառուցման աշխատանքներ:

Երկրորդ գերակայությունը ներառում է Համաշխարհային բանկի աջակցությամբ եւ ՀՀ կառավարության համաֆինանսավորմամբ իրականացվող «Ոռոգման համակարգերի վերականգնման հրատապ լրացուցիչ ֆինանսավորման ծրագրով» իրականացվելիք աշխատանքները: Կվերականգնվեն մոտ 50 կմ երկարությամբ մայր եւ միջտնտեսային ջրանցքներ Արագածոտնի, Կոտայքի, Շիրակի, Լոռու, Արարատի ու Արմավիրի մարզերում, եւ մոտ 63կմ երկարությամբ ներտնտեսային ոռոգման ցանցի ջրանցքներ Լոռու, Շիրակի, Գեղարքունիքի եւ Արմավիրի մարզերում: Ոռոգման համակարգերի վերականգնման հրատապ ծրագրի լրացուցիչ ֆինանսավորման ընդհանուր արժեքը 21,6 մլն դոլար է, այն արդեն մեկնարկել է եւ կավարտվի 2013թ. հունիսի 30-ին:

Միգրացիոն պետական ծառայությունը 2012թ. նախատեսում է «Փախստականների եւ ապաստանի մասին» ՀՀ օրենքում լրացումներ կատարելու ճանապարհով ապաստանի տրամադրման արագացված ընթացակարգ սահմանել: Ըստ ծառայության պետ Գագիկ Եգանյանի` ծառայությունը կիրականացնի նաեւ oտարերկրյա պետություններից վերադարձող ՀՀ քաղաքացիների վերաինտեգրման նպատակով նրանց սոցիալական կարիքների գնահատում եւ համապատասխան առաջարկներ կներկայացնի:

Նիստում քննարկվեց նաեւ «Տեղական տուրքերի եւ վճարների հայեցակարգի» նախագիծը: ՀՀ ՏԿՆ տեղական ինքնակառավարման վարչության պետ Աշոտ Գիլոյանի ներկայացմամբ` հայեցակարգի նպատակն է հստակորեն սահմանել եւ տարանջատել «տեղական տուրքեր» եւ «տեղական վճարներ» հասկացությունները, վեր հանել տեղական տուրքերի եւ վճարների հետ կապված ՀՀ օրենսդրությունում առկա թերությունները եւ բացերը, միատեսակ մոտեցում ցուցաբերել տեղական տուրքերի ու վճարների տեսակներն ու դրանց դրույքաչափերը սահմանելիս, ինչպես նաեւ հստակեցնել ՏԻՄ-երի լիազորություններն այդ հարցում: Այդ նպատակով կառաջարկվեն նաեւ օրենսդրական փոփոխություններ կամ կմշակվի նոր օրենքի նախագիծ: Ա.Գեւորգյանը հանձնարարեց մինչ նախագիծը կառավարություն ներկայացնելը` այն լրամշակել: