Դեղորայքի շուկայում դեռ նույն իրավիճա՞կն է

«Դեղորայքի շուկայում գների փոփոխությունների վերաբերյալ այս պահին ՏՄՊՊՀ-ն չի կարող տեղեկություն տրամադրել»,-Լուրեր.com-ի հետ զրույցում ասաց ՏՄՊՊՀ մամուլի քարտուղար Գայանե Սահակյանը:

Վերջինիս խոսքերով՝ հանձնաժողովն ուսումնասիրություն կատարում է միայն այն տնտեսվարողների մոտ, որոնց ենթակայության տակ կան գերիշխող սուբյեկտներ. «Հանձնաժողովը ստացել է դժգոհություններ՝ կապված դեղորայքի գնի բարձրացման հետ և արդեն մոտ երկու շաբաթ է, ինչ ուսումնասիրություն է կատարում այդ դաշտում: Մենք փորձում ենք գրանցել, թե որ դեղորայքներն են թանկացել, նախկինում ինչ գին են ունեցել, այժմ ինչքան են, իդենտիֆիկացնել դեղորայքը: Արդեն իսկ պահանջվել է տեղեկատվություն որոշ տնտեսվարողներից, որոշներից հավելյալ տեղեկատվություն, որից հետո մենք կկարողանանք մեր տեսակետը հայտնել»,-նշեց Սահակյանը:

Իսկ կա՞ որևէ ժամանակահատված, որ այդ ընթացքում արդեն պարզ կլինի շուկայի ամբողջական պատկերը. հարցրեցինք մենք, և հարցին ի պատասխան՝ մամլո քարտուղարն ասաց, «Օրենքով որևէ սահմանափակում գոյություն չունի։ Հանձնաժողովի ուսումնասիրություն կատարելու համար չկա նշված ժամկետ, որ պետք է կատարվի մեկ կամ երկու տարում: Այնուամենայնիվ, հանձնաժողովի նախագահի կողմից տրվել է հրահանգ հնարավորինս արագ շուկայում ուսումնասիրություններ կատարել՝ նկատի ունենալով շուկայի կարևորագույն նշանակությունը սպառողների համար: Այս պահին մեր վերլուծական խումբն աշխատում է ամենայն ակտիվությամբ և փորձում է հնարավորինս արագ պարզել շուկայում առկա իրավիճակը: Եթե կլինեն խախտումներ, անհարկի գնային բարձրացումներ, հանձնաժողովը համապատասխան միջոցներ կկիրառի»:

Հիշեցնենք, որ որոշ ժամանակ առաջ հայաստանյան դեղատներում սկսվեց նկատելի դառնալ դեղերի գների բարձրացումը՝ միջինը 15-20%-ով։ Որոշ դեղատեսակների գները բարձրացել են մինչև 50-70%-ով։