Մենք կբանակցենք Ռուսաստանի հաջորդ նախագահի հետ. Զելենսկու գրասենյակ

Ուկրաինան երբեք չի հրաժարվել Ռուսաստանի հետ բանակցություններից, Twitter-ում հայտնել է նախագահի աշխատակազմի ղեկավարի խորհրդական Միխայիլ Պոդոլյակը։

Նրա խոսքով՝ Ուկրաինայի դիրքորոշումը հայտնի է ու բաց. նախ Ռուսաստանը դուրս է բերում իր զորքերը Ուկրաինայի տարածքից, «հետո մնացած ամեն ինչը»։

«Պուտինը պատրա՞ստ է։ Ակնհայտորեն ոչ: Ուստի մենք կառուցողական ենք մեր գնահատականում։ Մենք կխոսենք Ռուսաստանի Դաշնության հաջորդ ղեկավարի հետ»,- գրել է Պոդոլյակը։

Մոսկվան բազմիցս հայտարարել է, որ բաց է բանակցությունների համար, սակայն Կիևը չի ցանկանում նստել սեղանի շուրջ։

Ռուսաստանի նախագահի մամուլի քարտուղար Դմիտրի Պեսկովը նոյեմբերի 7-ին ասել է, որ Ռուսաստանը բաց է Ուկրաինայի հետ բանակցությունների համար, սակայն այժմ նրանց համար հնարավորություն չի տեսնում՝ Կիևի դիրքորոշման պատճառով, որը հրաժարվել է երկխոսությունից։

«Մենք բազմիցս ասել ենք, որ ռուսական կողմը մնում է բաց և պատրաստ բանակցությունների միջոցով հասնել իր նպատակներին։ Բայց մենք նաև բազմիցս բոլորի ուշադրությունը հրավիրել ենք այն փաստի վրա, որ այս պահին մենք նման հնարավորություն չենք տեսնում, քանի որ Կիևը կոդավորել է, այսինքն՝ օրենքի է վերածել ռուսական կողմի հետ որևէ բանակցությունների չշարունակումը»,- ասել է Պեսկովը։