«Մարգար պապը» ֆիլմն արժանացել է մրցանակի և դիպլոմի

Ս. թ. սեպտեմբերի 24-30-ը Յալթայում անցկացվել է «Միասին» 13-րդ միջազգային հեռուստակինոֆորումը, որին ՀՀ մշակույթի նախարարության աջակցությամբ մասնակցել է երիտասարդ բեմադրիչ Գուժ Թադևոսյանը՝ «Մարգար պապը» ֆիլմով:

Հայաստանի ազգային կինոկենտրոնի աջակցությամբ նկարահանված «Մարգար պապը» կարճամետրաժ ֆիլմը՝ փառատոնի «Սկիզբ» անվանակարգում արժանացել է մրցանակի և դիպլոմի: «Միասին» 13-րդ միջազգային հեռուստակինոֆորումին մասնակցել են քսանյոթ երկրների, շուրջ 300 գեղարվեստական և վավերագրական ֆիլմեր:

Ժյուրին նախագահում էր ՌԴ ժողովրդական արտիստ Վլադիմիր Խոտինենկոն, ժյուրիի կազմում ընդգրկված էին հեղինակավոր կինոբեմադրիչներ Ալլա Սուրիկովան, Վլադիմիր Խոտինենկոն, Վլադիմիր Ախադովը, Լյուդմիլա Գլադունկոն: Փառատոնի շրջանակներում երիտասարդ բեմադրիչ Գուժ Թադևոսյանը մասնակցել է կինոռեժիսոր Ալեդսանդր Եֆրեմովի, դերասան Սերգեյ Սելինի, ՌԴ ժողովրդական արտիստ Լեև Դուրովի ստեղծագործական հանդիպումներին, ՌԴ ժողովրդական արտիստ Վլադիմիր Եպիսկոպոսյանի կողմից անցկացրած «Ժպտացեք վարպետի հետ միասին» խորագրով և կինոռեժիսոր Վլադիմիր Խոտինենկոի «Կինոյի լեզուն» վարպետության դասերին, Ռուսաստանի ժուռնալիստների միության նախագահ Վսեվոլոդ Բոգդանովի կազմակերպած «Վստահության ֆորմուլան» թեմայով միջազգային համաժողովին:

Փառատոնի շրջանակներում տեղի են ունեցել մի շարք գրքերի շնորհանդեսներ ևս: Ս. թ. հուվարի 16–ին, «Մարգար պապը» ֆիլմը մասնակցել է Մինսկի «Սինեմա Փերփետում Մոբայլ» միջազգային կինոփառատոնին և արժանացել հատուկ դիպլոմի՝ հավերժական ազատության թեմային անդրադառնալու համար: Ս. թ. հոկտեմբերի 18 -21-ը ֆիլմը նաև կմասնակցի Կանադայում «Նուռ», հոկտեմբերի 24-28-ը Երևանում անցկացվող «Ես եմ» 7-րդ միջազգային կինոփառատոններին: