ԱՄՆ-ում երեխաներին ստիպել են մաքրել սպանդանոցները, ինչի պատճառով` նրանք քիմիական այրվածք են ստացել

ԱՄՆ-ի Նեբրասկա և Մինեսոտա նահանգներում սպանդանոցներ են հայտնաբերվել, որոնք մաքրել են երեխաները, և անվտանգության նախազգուշական միջոցները չեն պահպանվել, ինչի պատճառով՝ դեռահասները քիմիական այրվածք են ստացել, հայտնում է Daily Mail-ը։

Գրանդ Այլենդում, Նեբրասկա և Ուորթինգտոնում, Մինեսոտա նահանգի գործարաններում, ինչպես նաև Մինեսոտա նահանգի Մարշալ քաղաքում գտնվող Turkey Valley Farms-ում քննիչները հայտնաբերել են 13-17 տարեկան 31 երեխայի: Նրանք աշխատել են մաքրող կապալառու Packers Sanitary Services-ում: Պարզվել է, որ երեխաները աշխատել են գիշերային հերթափոխով՝ մաքրելով վտանգավոր էլեկտրական սարքավորումները, ինչի հետևանքով՝ 13-ամյա երեխան և մյուս անչափահաս աշխատողները ստացել են կաուստիկ քիմիական այրվածքներ: Քննիչները կասկածում են, որ նմանատիպ խախտումներ կան նաև այլ գործարաններում։

Մաքրող ընկերության ադմինիստրացիան հերքում է բոլոր մեղադրանքները։ Նրանք կարծում են, որ երեխաները կեղծ փաստաթղթերի միջոցով իրենց մոտ աշխատանքի են տեղավորվել և խաբել իրենց ինքնությունը հաստատող համակարգին։

Քննիչների խոսքով՝ ընկերությունը ահաբեկել է տուժածներին, որպեսզի նրանք իրավապահներին ոչինչ չասեն։ Բացի այդ, մաքրող ընկերության սեփականատերերն ու աշխատակիցները կասկածվում են անչափահասների փաստաթղթեր կեղծելու, ինչպես նաև անվտանգության պահանջները խախտելու մեջ։