ՀՀ վերահսկիչ պալատի նախագահ Իշխան Զաքարյանը հանդիպում է ունեցել Նիդերլանդների Հաշվիչ դատարանի խորհրդի համանախագահ Գերիդ դե Յոնգի հետ

ՀՀ վերահսկիչ պալատի նախագահ Իշխան Զաքարյանը Նիդերլանդներ կատարած աշխատանքային այցի շրջանակներում հանդիպում է ունեցել Նիդերլանդների Հաշվիչ դատարանի խորհրդի համանախագահ Գերիդ դե Յոնգի հետ: Հանդիպմանը մասնակցել է նաև Նիդերլանդներում Հայաստանի արտակարգ և լիազոր դեսպան Ձյունիկ Աղաջանյանը:

Ի. Զաքարյանը, շնորհակալություն հայտնելով հոլանդական կողմին հրավերքի եւ պատրաստակամության համար, նշել է, որ եվրոպական համագործակցության շրջանակներում կարևորվում է Նիդերլանդների հետ համագործակցությունը: «Ճիշտ է կան օրենսդրական տարբերություններ, սակայն շատ հարցերում մեր երկիրը փորձում է մոտենալ եվրոպական չափանիշներին»,- Դե Յոնգի հետ հանդիպմանն ասել է Ի. Զաքարյանը եւ տեղեկացրել,որ եվրոպական համագործակցության արդյունքում երկու տարվա ընթացքում ՎՊ-ն ներկայացրել է մոտ չորս տասնյակ օրենսդրական փոփոխությունների վերաբերյալ առաջարկություններ:

Գերիդ դե Յոնգն իր հերթին շնորհակալություն է հայտնել հաշվիչ դատարանի հրավերը ընդունելու և համագործակցելու համար: «Նիդերլանդների հաշվիչ դատարանը գոյություն ունի դեռևս 15-րդ դարից և մենք պատրաստ ենք մեր բազմադարյա փորձը փոխանցել մեր երիտասարդ գործընկերոջը՝ ՀՀ վերահսկիչ պալատին», - ասել է դե Յոնգը:

Այցի ընթացքում քննարկվել են 2012-2013 թվականների Նիդերլանդների հաշվիչ դատարանի կողմից Հայաստանի Հանրապետության վերահսկիչ պալատին տեխնիկական աջակցություն ցուցաբերելու վերաբերյալ նոր առաջարկները և համատեղ աշխատանքային ծրագրերը: Մասնավորապես՝ Բարձրագույն վերահսկիչ մարմինների միջազգային ստանդարտներին համապատասխանեցնելու նպատակով հոլանդացի փորձագետները կգնահատեն Վերահսկիչ պալատին վերաբերվող ՀՀ օրենսդրական և մեթոդական դաշտը: ՀՀ Վերահսկիչ պալատի տեղեկատվական տեխնոլոգիաների հզորացման նպատակով կբարելավվեն պալատի ենթակառուցվածքները:

Երկու երկրների բարձրագույն վերահսկիչ կառույցների համագործակցության արդյունքում 2012-2013 թվականների ընթացքում հոլանդական կողմը կշարունակի համակարգչային նոր սարքավորումների տրամադրումը, ինչպես նաև Վերահսկիչ պալատի ինտերնետային էջի /coc.am/ և էլեկտրոնային հասցեների համակարգի սպասարկման, կայքի անգլերեն եւ ռուսերեն թարգմանությունների ֆինանսավորումը:

Վերահսկողության արդյունավետության բարձրացման նպատակով հոլանդացի մասնագետները կօգնեն հայ գործընկերներին օգտագործել Եվրոպայում լայնորեն կիրառվող համակարգչային վերլուծական ժամանակակից ծրագրեր:

Ի. Զաքարյանի այցի ընթացքում, երկու երկրների Բարձրագույն վերահսկիչ մարմինների միջև ձեռք է բերվել պայմանավորվածություն տեխնիկական աջակցությունից բացի, սկսել համագործակցություն վերահսկողության ոլորտում: Որպես հայ-նիդերլանդական վերահսկողության գործնական քայլ՝ հաջորդ տարի կիրականացվի բնապահպանական թեմայով համատեղ վերահսկողություն, իսկ 2013-ին վերահսկողությունը կշարունակվի հարկային-մաքսային ոլորտներում:

Հիշեցնենք, որ ՀՀ Վերահսկիչ պալատի և Նիդերլանդների Հաշվիչ դատարանի համագործակցության հիմքը դրվել է 2009-ին՝ ՀՀ ՎՊ-ին տեխնիկական աջակցություն ցուցաբերելու մասին ստորագրված համագործակցության համաձայնագրով:

Տեղեկացնենք, որ ՎՊ նախագահ Իշխան Զաքարյանը Նիդերլանդներից կմեկնի ՌԴ մայրաքաղաք Մոսկվա, որտեղ հանդիպում կունենա ՌԴ հաշվիչ պալատի նախագահ Սերգեյ Ստեպաշինի հետ: