Ինդոնեզիայում կինը միայնակ պիկետ է կազմակերպել՝ Բայդենին կոչ անելով «դադարեցնել պատերազմը»

Ինդոնեզիայում Արևմտյան Ճավա նահանգից մի կին ձերբակալվել է, քանի որ նա ծրագրել էր Բալիի Նուսա Դուայում բողոքի ցույց կազմակերպել և կանգնեցնել ԱՄՆ նախագահ Ջո Բայդենի ավտոշարասյունը։ Այս մասին հայտնում է Kompas.com պորտալը։

Հաղորդվում է, որ տեղեկությունը հաստատել է Բալիի ոստիկանության հասարակայնության հետ կապերի բաժնի ղեկավար Կոմբես Սետիանտոն։ Նրա խոսքով, կինը միայնակ պիկետ է սկսել։ Նա, Բայդենի ավտոշարասյան մոտենալուն պես, պաստառ է բացել՝ «Դադարեցրեք պատերազմը։ Մարդու իրավունքներ։ Խաղաղություն» գրությամբ։

Սեթիանտոն հայտնել է, որ «կնոջ անզգույշ գործողությունները հաջողությամբ չեն պսակվել», քանի որ նրա գործունեությունը անմիջապես կասեցվել է դեպքի վայրում ծառայություն իրականացնող ոստիկանների կողմից։

«Նա ժամանակ չուներ որևէ բան անելու։ Նա նույնիսկ ժամանակ չուներ բացելու պաստառները», - ասել է ոստիկանության ներկայացուցիչը:

Նախաքննության արդյունքների համաձայն՝ կինն իր ընկերների հետ Բալի է ժամանել հանգստի նոյեմբերի 11-ին։ Այնուհետև, ըստ Սեթիանտոյի, նա կարողացել է ներթափանցել խիստ հսկվող տարածք: Ոստիկանությունը կարծում է, որ ձերբակալվածը կարող էր տեղեկանալ Ջո Բայդենի ժամանակացույցին YouTube-ում G20-ի գագաթնաժողովի ուղիղ հեռարձակման միջոցով։