Ինդոնեզիան 29 տոննա աղ է թափել Բալիի վրա, որպեսզի լավ եղանակ լինի

Ինդոնեզիայի օդերևութաբանության, կլիմայաբանության և երկրաֆիզիկայի գործակալության տվյալներով՝ Բալիում մոտ 30 տոննա աղ է ցողվել երկնքում՝ եղանակը կղզում G20 գագաթնաժողովի ժամանակ բարելավելու համար, գրում է Ռիա Նովոստին:

«Սա մեր սցենարի մի մասն է, որով պատրաստվում ենք G20-ի գագաթնաժողովի ընթացքում էքստրեմալ եղանակը կանխելու համար», - Tempo.co-ին ասել է գործակալության ղեկավար Դվիկորիտա Կարնավատին:

Նա հավելել է, որ մինչև 2022 թվականի նոյեմբերի 16-ը ինքնաթիռները Բալիի երկնքում առնվազն 28 թռիչք են իրականացրել և մոտ 29 տոննա աղ են թափել։ Ըստ Կարնավատիի՝ գործողությունն իրականացվել է Ինդոնեզիայի ռազմաօդային ուժերի, տրանսպորտի նախարարության և երկրի հանրային կապերի նախարարության հետ համագործակցությամբ։ «Ամպերի մեջ աղի ցրումն իրականացվել է, որպեսզի խտացման գործընթացն ավելի արագ տեղի ունենա, և անձրևը կարողանա տեղալ հենց անձրևային ամպերի՝ G20-ի գագաթնաժողովի վայր հասնելուց անմիջապես առաջ»,- ասել է գործակալության ղեկավարը։

Սակայն, ըստ ականատեսների, Բալիում գագաթնաժողովի վերջին օրը հորդառատ անձրևներ են տեղացել՝ ամպրոպով։