Միանգամից 71 թափուր աշխատատեղ ՊԵԿ-ում. Հայտարարվել է մրցույթ

Այսօր Պետական եկամուտների կոմիտեի նախագահի առաջին տեղակալ Արմեն Ալավերդյանն լրագրողների հետ հանդիպմանը հայտնեց, որ հարկային և մաքսային համակարգերի ավտոմատացմանն ու էլեկտրոնայնացմանը զուգահեռ այսօր անհրաժեշտություն են դառնում նաև կադրային, կառուցվածքային բարեփոխումները, աշխատաժամանակի և աշխատատեղերի արդյունավետ բաշխածվածության խնդիրը և նշել, որ ՊԵԿ–ը միանգամից 71 թափուր աշխատատեղի համար մրցույթ է հայտարարում։

Այս առումով լուրջ միջոցառումներ են անցկացվել նաև այս տարի, մասնավորապես առաջին եռամսյակում Երևանի հարկային տեսչությունների օպտիմալացման արդյունքում կրճատվել են 3 հարկային տեսչություններ»,-ըստ ՀՀ ԿԱ ՊԵԿ տեղեկատվության և հասարակայնության հետ կապերի բաժնի հաղորդագրության, ասել է նա։

«Արդյունքում 125 հարկային ծառայողներ, ովքեր չեն համապատասխանել կոմիտեի պահանջներին, համաձայն «Աշխատանքային օրենսգրքի», ազատվել են աշխատանքից: Իսկ երկրորդ եռամսյակում տարածքային հարկային 4 տեսչություններ են վերակազմակերպվել, արդյունքում 133 հարկային ծառայողներ ազատվել են աշխատանքից»,-հավելել է ՊԵԿ նախագահի առաջին տեղակալը։

Ինչպես նաև Արմեն Ալավերդյանը ասել է, որ նոր հարկային ծառայողներ ընտրելիս կոմիտեն առաջնորդվում է 3 հիմնական չափանիշներով. մասնագիտական բարձր պատրաստվածություն, համակարգչային հմտություններ և վերլուծական կարողությունների առկայություն:

«Մեր անձնակազմը պետք է պատրաստ լինի և կարողանա վերլուծություններ կատարել ըստ ոլորտների, վեր հանել ռիսկերը, ինչի հիման վրա էլ կիրականացվեն հսկողական գործառույթները»,- ընդգծել է Արմեն Ալավերդյանը:

Համակարգը բարձրակարգ կադրերով համալրելու գործընթացի շրջանակում ՊԵԿ-ն այսօր աննախադեպ մրցույթ է հայտարարում' միանգամից 71 թափուր աշխատատեղերի համար, հիմնականում տնտեսագիտական, հաշվապահական և իրավաբանական մասնագիտություններով:

Թափուր աշխատատեղերի զգալի մասը բաժին է ընկնում մարզերին: Իսկ մրցույթին մասնակցողներն առաջիկա 25 օրերին կարող են արդեն հայտ ներկայացնել ՊԵԿ կադրերի վարչություն:

Արմեն Ալավերդյանը՝ որպես ՊԵԿ ատեստացիոն և մրցութային հանձնաժողովի նախագահ, վստահեցրել է, որ մրցույթի արդյունքում կընտրվեն լավագույնները:

«Միաժամանակ շարունակվում է ՊԵԿ աշխատակիցների վերապատրաստման գործընթացը. այս տարի 800 տեսուչ արդեն իսկ ընդգրկված է ուսումնական գործընթացներում»,- ավելացրել է Արմեն Ալավերդյանը։