Դավիթ Սարգսյանի «արկածները» Դիլիջանում. համայնքապետի աղետալի ՕԳԳ-ն

ՏԻՄ վերջին ընտրությունների արդյունքում Դիլիջան համայնքի ղեկավար էր ընտրվել ՔՊ-ական Դավիթ Սարգսյանը: Անցել է բավական երկար ժամանակ և կարելի հետ հայացք գցել հասկանալու համար, թե որքան արդյունավետ է իր աշխատանքի մեջ համայնքապետը: Համայնքապետարանի պաշտոնական կայքից տեղեկանում ենք, որ համայնքում այս ընթացքում տեղի են ունեցել սույն անչափ կարևոր իրադարձությունները՝ ոմն բարերարի աջակցությամբ վերանորոգվում է Կամո փողոցի հասարակական տրանսպորտի կանգառը, հանդիպում է տեղի ունեցել Եթովպիայի Դաշնային Ժողովրդավարական Հանրապետության Ամհարա մարզի Դեսի քաղաքի պատվիրակության ներկայացուցիչների հետ, Սպիտակ համայնքի մարզադպրոցում անցկացվել է շախմատի մանկապատանեկան բաց առաջնություն, Հաղարծնի մանկապարտեզի սաները նվերներ են ստացել համագյուղացի Էդվարդ Գուլինյանի կողմից, Դիլիջան ազգային պարկի «Ազնվացեղ եղջերուների բազմացման կենտրոն»-ից բաց են թողնվել 3 առանձնյակ, «Թրաֆիքինգի կանխարգելում» թեմայով դասընթաց է տեղի ունեցել:

Նման բուռն գործունեություն ծավալելու հետ մեկտեղ համայնքապետը հասցրել է  բավականին ոչ միանշանակ պատմության կիզակետում  հայտնվել: Մամուլը ահազանգում է, որ Սարգսյանը որոշումներ է ընդունել, որով համայնքի հողերը շուկայականից ցածր գներով օտարել է Երեւանի բնակիչների, երբ Դիլիջանի շատ բնակիչներ տուն կառուցելու համար հողամաս չունեն։ Դիլիջանի համայնքապետարանի ինտերնետային կայքը տեղեկացնում է, որ 2022թ․ ապրիլի 18-ին Դ․ Սարգսյանը որոշում ընդունել է քաղաքացի Սուրեն Մանուկյանին աճուրդային կարգով հողամաս օտարելու մասին։ Դիլիջան համայնքի ղեկավարի 2022թ. մարտի 18-ի թիվ 149-Ա որոշմամբ 2022թ. ապրիլի 18-ին աճուրդի է ներկայացվել Դիլիջան համայնքի սեփականությունը հանդիսացող «Բնակավայրերի հողերից» 690.9քմ հողամաս, Դիլիջանի Սարալանջի փողոցի թիվ 40/2 հասցեում բնակելի տան կառուցման նպատակով, 4836300 դրամ մեկնարկային գնով, աճուրդում 4836300 դրամ առավելագույն գնով հաղթել է Երեւանի Կոմիտասի 7/2 շենքի բնակիչ Սուրեն Մանուկյանը, այդ մասին հողամասերն աճուրդային կարգով օտարող հանձնաժողովի կողմից կազմվել է արձանագրություն: 

Մայիսի 5-ին Դիլիջան համայնքի ավագանին, միաձայն՝ 18 կողմով, որոշել է համաձայնություն տալ Դիլիջան համայնքի սեփականությունը հանդիսացող «Գյուղատնտնտեսական նշանակության հողերից» 48049.7քմ մակերեսով թվով 6 հողամասերը, «Բնակավայրերի հողերից» 1169.2քմ ընդհանուր մակերեսով թվով 4 հողամասերը աճուրդի միջոցով օտարելու մասին համայնքի ղեկավարի առաջարկությանը և հաստատել մեկնարկային գները։ Եվ կրկին աճուրդային վաճառքի ներկայցված մեկնարկային գները շուկայականից ցածր են։ Օրինակ՝ «Բնակավայրերի հողերից» Կալինինի փողոցում գտնվող հասարակական կառուցապատման համար նախատեսված 360 քմ հողամասի աճուրդ-վաճառքի մեկնարկային գին է սահմանված 2 միլիոն 520 հազար դրամը, Օրձոնիկիձեի փողոցի 376 քմ հողամասի մեկնարկային գին՝ 2 միլիոն 632 հազար դրամը եւ այլն։

Ինչպես տեսնում ենք՝ Դիլիջանում իսկապես ապագա կա, մնում է պարզել՝ ում համար, եթե դիլիջանցիների խնդիրների մեծ մասը շարունակում է մնալ չլուծված...