Ուկրաինական հակամարտության հետևանքով ՌԴ քաղաքացիների ներհոսքից առավել մեծ օգուտը ստացել է Հայաստանը․ Forbes

Ուկրաինական հակամարտության  հետևանքով ՌԴ քաղաքացիների մեծ ներհոսքից առավել մեծ օգուտը ստացել է Հայաստանը։ Այս մասին տեղեկանում ենք Forbes ամսագրի հրապարակած տվյալներից, որն իր հերթին հղում է անում Renaissance Capital ներդրումային ընկերության ուսումնասիրությանը։

Դրա շնորհիվ, Ռուսաստանի և ԱՊՀ-ի հարցերով գլխավոր տնտեսագետ Սոֆյա Դոնեցի խոսքով, Հայաստանը ՀՆԱ-ի աճով առաջ է անցել ԱՊՀ մյուս բոլոր երկրներից։ ՀՀ-ի տնտեսական աճն այս տարի կարող է հասնել 14%-ի՝ չնայած այն հանգամանքին, որ նախնական կանխատեսումներով այն կազմելու էր 5%։  Այս ամենի վրա ազդել է ՏՏ ոլորտի բարձր որակավորում ունեցող ռուս մասնագետների ներհոսքը ՀՀ, սակայն  տնտեսության այլ ճյուղերը ևս կարող են շահել։

«ՀՀ-ն նպաստում է պետություն տեղափոխվող ՏՏ մասնագետների կամ բիզնեսի տեղայնացմանը, ինչը ձեռնտու է երկրի տնտեսությանը։ Այս ոլորտում առկա է երկնիշ աճ։ Հյուրանոցային, ռեստորանային, սպասարկման և առևտրի ոլորտներն այս պահին ունեն մինչև 30% աճ»,- ասել է Դոնեցը։

«Սակայն որոշ ռուսներ, ի վերջո, կցանկանան լքել Հայաստանը, ինչը կբերի երկրի տնտեսության դանդաղեցման։ Այս ռիսկերը միանշանակ կան։ Եվ լավ է, որ կառավարությունում ոչ ոք ռուսների հոսքը որպես միտում չի ընկալում։ Գումարների լրացուցիչ ներհոսքը իշխանությունները ծախսել են բյուջեի դեֆիցիտի և արտաքին պարտքի կրճատման վրա»,- կարծում է տնտեսագետը։