ՆԱՏՕ-ն 2014-ի համեմատ ավելացրել է ռազմական ծախսերը 350 միլիարդ դոլարով. Ստոլտենբերգ

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ դաշինքի անդամ երկրները 2014 թվականի համեմատությամբ 350 մլրդ դոլարով ավելացրել են իրենց ռազմական ընդհանուր ծախսերը։ Այդ մասին նա հայտարարել է Մադրիդում դաշինքի խորհրդարանական վեհաժողովի նիստի ժամանակ, հեռարձակումն իրականացվել է կազմակերպության կայքում։

«2022 թվականը կլինի ութերորդ տարին անընդմեջ, երբ մենք ավելացրել ենք պաշտպանության ծախսերը։ Հավելյալ գումարը, որը մենք ծախսում ենք պաշտպանության վրա 2014 թվականից, մինչև տարեվերջ կհասնի 350 միլիարդ դոլարի»,- ասել է նա։

Ավելի վաղ Լեհաստանի ազգային պաշտպանության նախարար Մարիուշ Բլաշչակը հայտարարել էր, որ երկիրը 2023 թվականին զանգվածաբար ռազմական տեխնիկա կգնի և կավելացնի ռազմական բյուջեն։

Նրա խոսքով՝ 2023 թվականին Լեհաստանը ռազմական ծախսերի վրա կծախսի ազգային ՀՆԱ-ի առնվազն 3 տոկոսը կամ 97,5 միլիարդ զլոտի։ Նա պարզաբանել է, որ հին խորհրդային տեխնիկան Ուկրաինային փոխանցելուց հետո լեհական բանակը շտապ վերազինման կարիք ունի։

Մինչ այս Գերմանիայի պաշտպանության նախարարության ղեկավար Քրիստինա Լամբրեխտը հայտարարել էր, որ գերմանական իշխանությունները նախատեսում են մեծացնել պաշտպանական ծախսերը։ Նրա խոսքով, ՆԱՏՕ-ն Գերմանիայի անվտանգության երաշխավորն է, հետևաբար, որպես դաշինքի անդամների միջև պաշտպանության ֆինանսական բեռի բաշխման մաս, Գերմանիան նախատեսում է ավելացնել ծախսերի այդ հոդվածը։