Անդարդ քաղաքապետը. ի՞նչ է անում Հրաչյա Սարգսյանը Facebook-ում

Երևանի քաղաքապետ Հրաչյա Սարգսյանն այսօր կայացած ավագանու նիստի ընթացքում կրկին զայրանալու առիթ էր գտել: Պարզվում է՝ քաղաքապետն անձամբ ֆեյսբուքյան «քոմենթներ» է կարդում և նկատում է, որ քաղաքացիների բողոքներին պատշաճ արձագանք չի տրվում:

«Ես մի քանի պատասխան եմ կարդացել: Քաղաքացիների գրած ֆեյսբուքյան ահազանգերի պատասխաններն ես անձամբ նայում եմ, հետո նոր տեղադրում ենք, այդտեղ, վարչական շրջաննե՛ր, պատասխանների հետ լուրջ խնդիր ունենք: Ես նայում եմ այն տրամաբանությամբ, որ եթե ես լինեմ քաղաքացի և դիմեի քաղաքապետարան, ինձ ինչպե՞ս կպատասխանեին»,-ասել է քաղաքապետը և քարտուղարության պետի ժամանակավոր պաշտոնակատար Էդգար Աբրահամյանին հանձնարարել ուսումնասիրություններ իրականացնել և զեկուցել թեժ գծով ստացված ահազանգերի պատասխանների բովանդակությունը կարգավորելու մեխանիզմները:

Ի՞նչ է ստացվում. Երևանի քաղաքապետը Երևանի խնդիրների և իր աշխատակիցների թերացման մասին իմանում է սոցիալական ցանցերից, այսինքն՝ նա այդ աստիճան չի տիրապետում իր իսկ ղեկավարած կառույցում առկա իրավիճակին: Նաև մեծ հարց է, թե ինչպես է Սարգսյանը ժամանակ գտնում անձամբ կարդալու ֆեյսբուքյան մեկնաբանությունները, երբ քաղաքը խրված է խնդիրների մեջ, որոնք օպերատիվ լուծումներ են պահանջում...