Թուրք երաժշտին դատում են աստվածապղծության մեղադրանքով

Թուրք երաժիշտ և կոմպոզիտոր Ֆազիլ Սայը հոկտեմբերի 18-ին կանգնելու է դատարանի առջև՝ հավատացյալների կրոնական զգացմունքները վիրավորելու և կրոնական ատելություն սերմանելու մեղադրանքով. փոխանցում է Agence France-Presse-ը:

Բեռլինի, Նյու Յորքի և Տոկիոյի հանրահայտ բեմերում ելույթ ունեցող Սային դատելու են իր միկրոբլոգում արված գրառումների պատճառով: Մասնավորապես, դատախազությանը վրդովեցրել է հետևյալ գրառումը. «Չգիտեմ, նկատե՞լ եք դուք, որ բոլոր ապուշները, գռեհիկները, գողերն ու խեղկատակները հենց մոլի հավատցյալներն են»:

Associated Press-ը նշում է կրոնական գործիչների զայրույթն առաջացրած նրա ևս մեկ գրառում, որը վերաբերում էր կրոնական աղոթքի կոչ անող մուեզինին, ով աղոթքի կոչն ավարտել էր ընդամենը 22 վայրկյանում: Դրանում ասված է «Ո՞ւր էր նա այդպես շտապում, սիրուհի՞ն էր անկողնում սառչում, թե՞ ճաշը սեղանին»:

Սայի նկատմամբ մեղադրանքի հարուցումից հետո ստամբուլյան դատարանի շենքի դիմաց հարյուրից ավել իրավապաշտպաններ ցույցի դուրս եկան՝ վանկարկելով «Սայ, դու մենակ չես»:

Երաժշտին մեղավոր ճանաչելու դեպքում նրան սպառնում է 1.5 տարվա ազատազրկում: 

Սայը չափավոր իսլամիստ վարչապետ Ռեջեփ Թայյիփ Էրդողանի ամենասուր քննադատներից մեկն է: