Associated Press-ը աշխատանքից հեռացրել է լրագրողին՝ պատճառաբանելով, որ նա Լեհաստանում ռուսական հրթիռների անկման մասին կեղծիք է տարածել

Associated Press-ը աշխատանքից ազատել է լրագրող Ջեյմս ԼաՊորտային, ով տեղեկատվություն է տրամադրել Լեհաստանում ռուսական հրթիռների ընկնելու մասին, որոնք, ինչպես հետագայում պարզվել է, կեղծ են։ Այս մասին հայտնում է The Washington Post-ը՝ հղում անելով հրատարակության աղբյուրներին։

Նոյեմբերի 15-ին ուկրաինական սահմանի մոտ գտնվող լեհական Պրժևոդով գյուղի մոտ տեղի ունեցած պայթյունից որոշ ժամանակ անց AP-ն հրապարակեց մի նյութ՝ վկայակոչելով ԱՄՆ հետախուզության բարձրաստիճան պաշտոնյային: Նա հայտարարել է, որ ռուսական հրթիռներն անցել են ՆԱՏՕ-ի անդամ Լեհաստանի տարածքը, ինչի արդյունքում՝ երկու մարդ է մահացել։ Նշվում է, որ այս տեղեկությունը տարածել են այլ լրատվամիջոցներ։

Հաջորդ օրը AP-ն փոխարինեց նախնական լուրը և ընդունել, որ նախկինում տրված տվյալները ճիշտ չեն: Associated Press-ը սխալ տեղեկատվություն է հրապարակել՝ հիմնված ԱՄՆ հետախուզության բարձրաստիճան պաշտոնյայի տեղեկատվության վրա, ով, անանունության պայմանով, ասել է, որ ռուսական հրթիռները անցել են Լեհաստան և երկու մարդու մահվան պատճառ դարձել: Հետագա հաղորդագրությունները ցույց տվեցին, որ հրթիռները ռուսական արտադրության են և, ամենայն հավանականությամբ, արձակվել են Ուկրաինայի կողմից՝ Ռուսաստանից պաշտպանվելու համար: