Բժիշկները հայտնել են՝ հղիության ընթացքում մեկ բաժակ գինին ինչ հետևանքներ կարող է ունենալ

Ավստրիայի Վիեննայի բժշկական համալսարանի գիտնականները պարզել են, որ երեխայի ուղեղի զարգացումը կարող է հետաձգվել և կառուցվածքային փոփոխությունների ենթարկվել, եթե մայրը հղիության ընթացքում նույնիսկ փոքր քանակությամբ ալկոհոլ օգտագործի: Հետազոտության արդյունքները ներկայացվել են Հյուսիսային Ամերիկայի Ռադիոլոգիական ընկերության տարեկան ժողովին։

Գիտնականները վերլուծել են 22-36 շաբաթական 24 հղիների պտղի MRI արդյունքները։ Նրանք բոլորը հղիության ընթացքում ալկոհոլ են օգտագործել։ Հետազոտողները պարզել են, որ երեխաների ընդհանուր հասունացման միավորները զգալիորեն ցածր են։ Բացի այդ՝ ուղեղի այն հատվածը, որը ներգրավված է սոցիալական ճանաչողության, տեսալսողական ինտեգրման և լեզվի ընկալման մեջ, փոքր է մնացել:

Պտղի մոտ գլխուղեղի փոփոխություններ են նկատվել, նույնիսկ երբ մայրը մի քիչ ալկոհոլ է օգտագործել: 24 կանանցից 17-ը հազվադեպ է ալկոհոլ օգտագործել, միջին հաշվով կանայք շաբաթական մեկ բաժակից քիչ ալկոհոլ են խմել:

Դեռ պարզ չէ, թե կառուցվածքային այս փոփոխություններն ինչպես կազդեն ծնվելուց հետո այս երեխաների ուղեղի զարգացման վրա։ Գիտնականները նախատեսում են հետևել երեխաների հետագա առողջությանը։