«Կցանկանայի, որ մեր երիտասարդները սիրահարված լինեին գրականությանը». Կարեն Անտաշյան

«Գրական 2011–ը քարերը նետելու ժամանակն էր։ Տարին արմատական բեկումներով աչքի չընկավ, սակայն գրական դաշտը զարգացնելու համար ռեալ քայլեր արվեցին», – այսօր «Հայելի» մամուլի ակումբում լրագրողների հետ հանդիպման ժամանակ 2011 թվականն ամփոփելիս ասաց «Գրանիշ» գրական ակումբի հիմնադիր Կարեն Անտաշյանը։

Նա նշեց, որ գրականությունը զարգացնելու համար հարկավոր է գրական շուկա ստեղծել։ Իսկ այն ձեռքբերումները, որն ունեն այսօր, արվում է իրենց անձնական միջոցներով և միմիայն գործընկերության սկզբունքներով, քանի որ պետությունն այս ուղղությամբ ոչինչ չի ձեռնարկում։

«Այս տարվա կարևոր փոփոխություններից մեկն այն է, որ Գրողների միությունն աստիճանաբար զիջում է իր դիրքերը, ինչը բնական և ճիշտ գործընթաց է. ձևավորվում են գրական փոքրիկ միություններ, այսինքն մրցակցություն է ձևավորվում, ինչը նպաստում է գրական շուկայի զարգացմանը», – նշեց «Գրանիշ» գրական ակումբի հիմնադիրը։

Նրա խոսքերով՝ այսօր ընթերցանությունը հանրային հետաքրքրության նյութ դարձնելու խնդիր ունենք. Հայաստանում ուշադրություն չեն դարձնում գրականությանը։

«2012–ին Հայաստանը հռչակվելու է գրքի մայրաքաղաք, սակայն ես կցանկանայի, որ մեր երիտասարդները սիրահարված լինեին գրականությանը, այլ ոչ թե Երևան–Սևան մայրուղու վրա տեսնեի մի մեծ պոստեռ, որի վրա տուրիստների համար մեծ տառերով գրված է, թե 2012–ը գրքի տարի է», – նկատեց Կարեն Անտաշյանը։