Արտասահմանյան լրատվամիջոցը խորհուրդ չի տալիս ճամփորդել Ադրբեջան

Travelvivi.com-ը կազմել է պետությունների մի ցուցակ, ուր զբոսաշրջիկներին խորհուրդ չի տրվում այցելել: Պապուա Նոր Գվինեայի, Հայիթիի, Եգիպտոսի և Լաոսի հետ միասին այս ցուցակում հայտնվել է նաև Ադրբեջանը:

Հարավարևելյան Եվրոպայում՝ Կովկասում տեղակայված Ադրբեջանը, որը սահմանակից է Վրաստանին, Հայաստանին, Թուրքիային, Իրանին, Կասպյան ափամերձ շրջանին և Ռուսաստանին, որպես ազգ և պետություն ձևավորվել է 20-րդ դարում: Այն հայտնի է Կրակների աշխարհ անունով և այն հինգ պետությունների շարքում է, ուր զբոսաշրջիկները խուսափում են այցելել: Եվ դա առանց պատճառի չէ: Ունենալով գեղեցիկ բնություն և բազմաթիվ տեսարժան վայրեր, որոնցից շատ ու շատերը ընդգրկված են UNESCO-ի Համաշխարհային ժառանգության ցուցակում, և որոնք ադրբեջանցիները միայն իրենցն են համարում, նավթով ու գազով հարուստ Ադրբեջանը շարունակում է մնալ այն պետությունների շարքում, որտեղ մեծ մտահոգություն են առաջացնում խոսքի և լրատվական միջոցների ազատությանը վերաբերող, ինչպես նաև մաշկի գույնի, էթնիկ ծագման կամ կրոնի պատճառով ծաղրված լինելու, թալանվելու, վիրավորվելու կամ ֆիզիկական հարձակման ենթարկվելու հետ կապված խնդիրները:

Ադրբեջանը վերջերս հայտնվեց միջազգային լրատվամիջոցների ուշադրության կենտրոնում՝ կացնահար Ռամիլ Սաֆարովին ներում շնորհելու և հերոսի կարգավիճակ տալու պատճառով:

Սա միգուցե կապված է այս պետության պատմության հետ, որի ընթացքում այն շատ պատերազմների, նվաճումների և իրադարձությունների ականատես է եղել, ինչը հետք է թողել տեղացիների խառնվածքի և պետությունում տիրող մթնոլորտի վրա:

Օտարերկրացիները մեծ վտանգի են ենթարկվում՝ հայտնվելով ամբոխի մեջ կամ մեկուսացված տարածքում: Նման հաղորդագրություններ են ստացվել գիշերային ժամերին բար այցելած օտարերկրացիներից, որոնք տուժել են այդ ժամերին իրականացված հանցագործություններից: Բողոքներ կան նաև կանանցից, որոնք անհարմար դրության մեջ են հայտնվում տղամարդկանց անհարկի ուշադրությունից և վիրավորական վարվելակերպից: