Թևեր և թիմեր․ ինչ է կատարվում ՔՊ-ի՝ Արարատի «ներքին խոհանոցում»

Հեղափոխությունից հետո մի շարք մարզերում ստեղծված իրավիճակը, երբ ՔՊ-ականների միջև լարվածության և բացահայտ հակասությունների արդյունքում իշխանությունները տանուլ տվեցին ընտրապայքարը, վերջիններիս համար, կարծես թե, դաս չի հանդիսացել:

Այդ սցենարը այսօր էլ իրագործվում է մի շարք մարզերում, դիցուք՝  Արարատի մարզում, որտեղ հեղափոխությունից հետո ակնհայտ կերպով բախում էր ընթանում ՔՊ-ական արդեն երկու նախկին մարզպետների միջև։ Վերջիններիս միջև լարվածությունը նոր չէ, մամուլը բազմիցս է անդրադարձել, օրինակ, նրան, որ Ռազմիկ Թևոնյանն առանձնապես ջանք չէր թափում Վեդիում համայնքի ղեկավարի պաշտոնին առաջադրված Գարիկ Սարգսյանին աջակցելու համար: Թեւոնյանը շարունակում էր ի դեմս Գարիկ Սարգսյանի իրեն մրցակից տեսնել, իսկ Սարգսյանը չէր կարողանում մարսել, որ իրեն փոխարինել են Թեւոնյանով։

Դրանից հետո անգամ տեղեկություն տարածվեց, որ Թևոնյանը հրաժարականի դիմում է գրել, սակայն արդյունքում հետ է կանգնել պաշտոնը թողնելու մտքից: Պատճառներից մեկը նշվում էր իշխանական բուրգի ներսում վերադասավորումների հանգամանքը․ ասում են՝ Փաշինյանը մտադիր էր Գարիկ Սարգսյանին վերադարձնել մարզ՝ Արարատի մարզպետի պաշտոնին: Սակայն, ինչպես ցույց տվեց ժամանակը, Փաշինյանն այս փուլում նախապատվությունը տվեց Թևոնյանին:

Մամուլն այլ ուշագրավ տեղեկություններ էլ է հայտնում: Մասնավորապես՝ Արարատի մարզից Oragir.News-ին ահազանգում են, որ Արարատի նախկին մարզպետը Թևոնյանի ղեկավարման ընթացքում շարունակում էր մնալ «դե ֆակտո» մարզպետ, իսկ մարզպետ Ռազմիկ Թևոնյանը պարզապես «ֆուտլյար» էր։ Բացի այդ, գրվել է նաև այն մասին, որ Թևոնյանն ու Սարգսյանը, մեկը մյուսից առաջ ընկնելով, իրար վրա «գործ էին տալիս» իրավապահներին: 

Ռազմիկ Թևոնյանից հետո այդ պաշտոնը սակայն անցավ ոչ թե Գարիկ Սարգսյանին, այլ Թևոնյանի որդուն՝ Սեդրակին: Այսօր, ըստ էության, ՔՊ-ական մի թևը ղեկավարում է հենց մարզպետը, մյուսը՝ Վեդիի համայնքապետ դարձած, սակայն, մարզպետարանում ի դեմս իր կադրերի լծակներ պահպանած Գարիկ Սարգսյանը: Ի դեպ, Սեդրակ Թևոնյանը այս առումով ևս պարապուրդի մատնված չէ և ամեն գնով փորձում է ազատվել մարզպետարանում Սարգսյանին հավատարիմ կադրերից:

Բացի այս երկու ֆիգուրից, մարզում բավական մեծ լծակների է տիրապետում Նիկոլ Փաշինյանի մտերիմ համարվող՝ Արտաշատի համայնքապետ Կառլեն Մկրտչյանը: Վերջինս կարողացել է լեզու գտնել Արտաշատի երբեմնի բդեշխ Հովիկ Աբրահամյանի հետ: Մամուլը գրել էր, որ համայնքապետի պաշտոնը ստանձնելուց հետո Մկրտչյանը որոշումներ է կայացնում ինքնուրույն ելնելով իր և մերձավոր շրջապատի շահերից:

Ըստ էության, Արարատի մարզում ազդեցության հիմնական գոտիները բաժանված են երեք պաշտոնյայի միջև, որոնք էլ, աշխատելով միմյանց դեմ, փորձում են էլ ավելի մեծ լծակներ ստանալ և այդ ընթացքում չեն խորշում աշխատել միմյանց դեմ...