Ինչով են աչքի ընկել Երևանի փոխքաղաքապետերը. Ստեփան Մաչյան

Այս տարվա սկզբին Երևանի քաղաքապետի տեղակալի պաշտոնում նշանակվեց Ստեփան Մաչյանը, ով մինչ այդ՝ 2019-ին, զբաղեցրել է Աշխատանքի և սոցիալական հարցերի նախարար Զարուհի Բաթոյանի խորհրդականի պաշտոնը, իսկ 2020 թվականից աշխատանքի էր անցել «Ճանապարհային դեպարտամենտ» ՊՈԱԿ-ում: Ի դեպ, Մաչյանը համարվում է ոչ միայն նախկին փոխվարչապետ, այժմ փոխքաղաքապետ և ՔՊ քաղաքապետի թեկնածու Տիգրան Ավինյանի մտերիմ ընկերը, այլ նաև նախկին նախարար Զարուհի Բաթոյանի քրոջ՝ Սյուզաննա Բաթոյանի տեգրն է: Սակայն, անդրադառնանք Մաչյանը գործունեությանը արդեն փոխքաղաքապետի պաշտոնում: Քաղաքապետի որոշման համաձայն Մաչյանը համակարգում և վերահսկում է քաղաքապետարանի աշխատակազմի ճարտարապետության և քաղաքաշինության վարչության, քաղաքաշինական գործունեության հատուկ կարգավորման ծրագրերի բաժնի աշխատանքները: 

Մետրոյի Աջափնյակ կայարանի կառուցման նախագծային աշխատանքների կուռացիան իրականացրել է հենց Մաչյանը: Շատ փորձագետների կարծիքով՝ այստեղ գործ ունենք գերագնահատված պրոյեկտի հետ: Միևնույն ժամանակ, չնայած ներդրված զգալի ֆինանսական միջոցներին, Մաչյանի և քաղաքապետարանի նոու-հաուի սայլը տեղից չի շարժվում և մետրոյի նոր կայարանի կառուցման աշխատանքները դոփում են տեղում, կառուցման թեզն էլ առավելապես օգտագործվում է ՔՊ-ականների փիառի նպատակով:

Մյուս խնդիրը, որին պաշտոնավարման ընթացքում բախվեց Մաչյանը, անշուշտ, Կոնդ թաղամասի վերակառուցման խնդիրն էր, որին, մեղմ ասած, լուծում չի առաջարկվել: Կոնդի վերակառուցման հայեցակարգերն այդպես էլ մնացել են սառույցին գրված, որևէ կառուցապատում տեղի չի ունեցել:

Փոխարենը՝ Երևանի այլ թաղամասերում կառուցապատման թույլտվություններ են բաշխվում, որոնց մի մասը տարակուսանք է առաջացնում՝ օրենքի համապատասխանության տեսանկյունից: Դիցուք՝ Աջափնյակ վարչական շրջանի Նորաշեն 4-րդ թաղամասի բնակիչներն  անակնկալի են եկել՝ տեսնելով, որ իրենց բարձրահարկ շենքերի արանքում՝ ընդամենը 1,5 մետր հեռավորության վրա, պատրաստվում են նոր՝ 12 հարկանի շենք կառուցել։ Այսինքն՝ գործ ունենք օրենքի նորմերի բացահայտ խախտման հետ, սակայն շինթույլտվություն տրամադրվել է:

Նույնիսկ քաղաքապետ Հրաչյա Սարգսյանն է նշել, որ քաղաքապետարանից ամենաշատը բողոքում են հենց տրամադրած շինթույլտվությունների պատճառով:

Ընդհանրապես, փաստ է, որ Երևանի շինհրապարակներում կատարյալ ամենաթողություն է տիրում: Վերջին ամենավառ դրվագն արձանագրվեց այն ժամանակ, երբ Դալմայի այգում շինարարություն իրականացնելու հետեւանքով փլուզվեց հենապատը, որի պատճառով Ծիծեռնակաբերդի խճուղին փակվել էր։ Հարց է առաջանում՝ ո՞վ է շինթույլտվություն տվել այն հատվածում, որը սողանքավտանգ հատված է։ Մեկ այլ դրվագ էլ կարելի է առանձնացնել:  Քաղաքապետարանի պաշտոնյաները չեն կարողանում պատասխանել այն հարցին, թե ինչպես է ահռելի չափեր ունեցող, մայրաքաղաքի բազմաթիվ վայրերից տեսանելի «Սատանայի անիվը» առանց թույլտվության հայտնվել «Հաղթանակ» զբոսայգում։ Հսկայական ատրակցիոնն այստեղ է արդեն մի քանի ամիս, բայց սրա մասին սկսեցին խոսել միայն վերջերս, երբ քաղաքապետ Հրաչյա Սարգսյանը նիստերից մեկում ենթականերին հարցրեց՝ տեղյա՞կ են արդյոք ապօրինի շինության մասին: Պարզվեց՝ տեղյակ չեն: Ավելին՝ կռուցապատողն առանց համապատասխան թույլտվության իրականացրել է նշված կառույցի իրականացումը: Այսինքն՝ սրանք խնդիրներ են, որոնք պարզապես աչքաթող են արվել:

Ապօրինի կառուցապատման դեպքերից զատ Երևանում գրանցվում են նաև ապամոնաժման աշխատանքներ, որոնք նույնպես հաճախ բազմաթիվ հարցեր են առաջացնում: Դիցուք, քաղաքապետարանի ճարտարապետության և քաղաքաշինության վարչության ձեռքերը, չգիտես ինչու, չեն հասնում օլիգարխների օբյեկտներին: Տեղում են Հրազդանի կիրճում գտնվող բազմաթիվ նախկին պաշտոնյաների օբյեկտները, մինչդեռ տարիներ շարունակ մամուլը գրում էր, որ դրանց մի մասը ապօրինի է կառուցված: Օրինակ՝ «Մոնտե-Քրիստո» ռեստորանային համալիրի տերը քաղաքապետարանի առեւտրի եւ սպասարկման վարչության երկար տարիների պետ Լեւոն Հարությունյանն է: Աչքի ընկնող եւ այցելուներով հարուստ օբյեկտներից է նաեւ «Գեղամա» ռեստորանային համալիրը: Այստեղ են այցելում գրեթե բոլոր բարձրաստիճան զինվորականները: Բացի ռեստորանից, համալիրը նաեւ գարեջրատուն ունի: Պտտվող լուրերի համաձայն` այն պատկանում է Ռազմական ոստիկանության պետի նախկին տեղակալ Ռազմիկ Խանզրադյանին:  Հրազդանի «ձորում մխրճված» նավի տերը, ըստ մամուլի, հայտնի գործարար Արայիկ Հայրապետյանն է (Լավանդայի Արայիկը): Ի դեպ, նույն մամուլը վերջերս գրել էր, որ Արայիկ Հարությունյանը այժմ փորձում է սիրաշահել գործող իշխանություններին և նոր հենարան գտնել: Մոնումենտի հայտնի դղյակները, որոնք անձամբ Նիկոլ Փաշինյանն էր ապօրինի կառուցված շինություններ անվանում, ոչ միայն տեղում են, այլև բարեհաջող կերպով վաճառվում-գնվում են:

Ընդհանուր առմամբ, կարող ենք փաստել, որ փոխքաղաքապետ Մաչյանի կուռացիայի տակ գտնվող հարցերը և դրանցից բխող խնդիրները ոչ միայն համալիր լուծման չեն արժանացել, այլ նաև լուրջ գլխացավանք են դարձել երևանցիների համար: 

Շարունակելի...