Նոր և պոտենցիալ վտանգավոր վիրուսներ են հայտնաբերվել չղջիկների մոտ

Յունանի ինստիտուտի չինացի փորձագետների խումբը չղջիկների մոտ հայտնաբերել է հինգ նոր և պոտենցիալ վտանգավոր վիրուս: Հետազոտության նախնական արդյունքները հրապարակված են bioRxiv-ում, հաղորդում է Lenta.ru-ն։

Աշխատանքի ընթացքում գիտնականներն ուսումնասիրել են Չինաստանի հարավում՝ Յունան նահանգում ապրող 15 տարբեր տեսակների 149 չղջիկների աղիքներ: Արդյունքում նրանք կարողացել են հաջորդականացնել հինգ նախկինում անհայտ պաթոգենների գենոմը: Հայտնաբերված բոլոր վիրուսները զոոնոզ են, այսինքն՝ ունեն մի տեսակից մյուսը տեղափոխվելու հատկություն, ինչը կարող է վտանգավոր լինել մարդու օրգանիզմի կամ անասունների համար։ Արձանագրված պաթոգեններից մեկը BtSY2-ն է, որն ունի SARS-CoV-2-ի՝ COVID-19-ի հարուցիչի նման հատկանիշներ: Նմանատիպ կառուցվածք ունենալը մեծացնում է կենդանիներից մարդուն փոխանցման վտանգը:

Բացի այդ, հետազոտողներին անհանգստացնում է այն փաստը, որ ուսումնասիրված մեկ անհատը կարող է վարակվել միանգամից մի քանի վիրուսով։ Առայժմ հեղինակները նախատեսում են շարունակել պաթոգենների հետազոտումը և դրանց խորը ուսումնասիրությունը՝ ապագա համաճարակները կանխելու համար: