«Թուրքիայի ղեկավարությունը պետք է փոխի Սիրիայի հանդեպ իր դիրքորոշումը». նախկին արտգործնախարար

Իրանի նախկին արտգործնախարար Մանուչեհր Մոթաքին Թեհրանի համալսարանում ելույթ ունենալիս քննադատության է ենթարկել Սիրիայի հանդեպ Թուրքիայի վարած քաղաքականությունը։

Նա հայտարարել է, որ Թուրքիայի ղեկավարությունը պետք է փոխի Սիրիայի հանդեպ իր դիրքորոշումը։ Վերջին 3 ամիսներին Թուրքիայի վարած սիրիական քաղաքականությունը սխալ է, ուստի Թուրքիան պետք է վերանայի այն. այդ քաղաքականությունը ոչ մի արդյունք չի տա։ «Թուրքիան պետք է հասկանա, որ Բաշար Ասադի ռեժիմը չի ընկնի»,- ասել է նախկին արտգործնախարարը։

«Վերջին շրջանում Սաուդյան Արաբիան միջամտում է արաբական երկրների ներքին գործերին։ Մենք տեսել ենք դրա վատ հետևանքներն Իրաքում։ Այժմ Սաուդյան Արաբիան օգնում է սիրիական ընդդիմությանը»,– հայտարարել է Մանուչեհր Մոթաքին։

Մանուչեհր Մոթաքին Իրանի արտգործնախարար է նշանակվել 2005 թվականին և պաշտոնավարել մինչև 2010 թվականի դեկտեմբերի 13-ը։