ՔՊ-ի «լռակյացները». Մերի Գալստյանի «բուռն» օրենսդրական գործունեությունը

Իշխող Քաղաքացիական պայմանագիր կուսակցության պառլամենտական խմբակցությունում մշտապես ակտիվ և աչքի ընկնող պատգամավորների կողքին կան նաև այնպիսինները, որոնց մասին հանրությունը կարելի է ասել մոռացել է, քանի որ վերջիններս իրենց մասին հիշելու և խոսելու բավական քիչ առիթ են տալիս իրենց իսկ պասիվությամբ:

Դիցուք՝ ՔՊ-ական պատգամավոր Մերի Գալստյանը: Գալստյանը պատգամավորի մանդատը ստանձնել է 2019-ին և այս ընթացքում վերջինիս մոտ փոխվել է թերևս միայն ֆինանսական դրությունը: Դիցուք՝ 2019-ին նա հայտարարագրել էր ընդամենը 317,000.00 դրամի եկամուտ: Այսօր արդեն Գալստյանի եկամուտները կազմում են 14,343,440.00 դրամ, ներառյալ փոխառությունները:

Գալստյանը բացակայել է 107 անգամ, ունեցել ընդամենը 1 ելույթ, տվել 0 հարց, հեղինակել 0 նախաձեռնություն: 

Մերի Գալստյանը, որը պատերազմի ժամանակ Աննա Հակոբյանի գլխավորած «Էրատո» ջոկատի մարտիկներից էր, համառորեն հրաժարվում է պատասխանել, թե ինչ մարտական գործողությունների է նա մասնակցել պատերազմի ժամանակ:

Գալստյանը նաև այլ մարտերում է աչքի ընկել: Մամուլը գրել էր, որ երբ երկու տարի առաջ, խորհրդարանն առաջին ընթերցմամբ ընդունեց «Ընդերքի մասին» ՀՀ օրենքում փոփոխությունների վերաբերյալ օրինագիծը, ըստ որի՝ ընդերքօգտագործման թույլտվություն կտրվի այն արդյունահանողին, որը կներկայացնի պաշարների ուսումնասիրության թարմ տվյալներ՝ պետք է տեղի ունենար օրենքի երկրորդ ընթերցումը, սակայն տնտեսական հարցերի մշտական հանձնաժողովի նիստի ժամանակ որոշում կայացվեց հետաձգել հարցի քննարկումը՝ որպես պատճառաբանություն ներկայացնելով մասնագետների մտահոգությունները:

Իրականում պարզվել է, որ «Իմ քայլը» խմբակցության պատգամավոր Մերի Գալստյանի ջանքերով է տապալվել նախագիծը։ Պատգամավորն, ըստ մամուլի տեղեկությունների, անձնական խնդիրներ ուներ տարածքային կառավարման և ենթակառուցվածքների փոխնախարար Լիլիա Շուշանյանի հետ, ով նշանակված է որպես նախագծի զեկուցող։ Պատգամավորը գործընկերներին համոզել է, որ հաշվի չեն առնվել իր առաջարկները, և չի կարելի խորհրդարանին այսպես արհամարհել։ Դա իր հերթին զայրացրել էր այն ժամանակվա նախարար Սուրեն Պապիկյանին, ով որոշել էր դաստիարակչական աշխատանքներ տանել ՔՊ-ական պատգամավորների հետ: