ՔՊ-ի «լռակյաց» պատգամավորները. Սարգիս Խանդանյան

Շարունակելով հանրության դատին ներկայացնել ՔՊ խորհրդարանական խմբակցության առավել նվազ հայտնի պատգամավորներին և վերջիններիս գործունեության արգասիքները՝ այսօր կանդրադառնանք Սարգիս Խանդանյանին:

Ավանդույթի համաձայն՝ համեմատենք, թե ինչպես է փոխվել պատգամավորի սոցիալ-ֆինանսական վիճակը պատգամավորական մանդատը ստանձնելու օրվա դրությամբ և այսօր: Պաշտոնը ստանձնելու օրվա դրությամբ Խանդանյանի բանկային հաշվի մնացորդը կազմել է 3,300,000.00 դրամ, եկամուտները տարբեր աղբյուրներից՝ 1,081,547.00 դրամ,  8,884,950.00 դրամ,  86,400.00 դրամ:

Արդեն այս տարի Խանդանյանը հայտարարագրել է 17,104,172.00 դրամի ստացված փոխառություն,  բանկային հաշվի մնացորդները կազմել են 2,000,000.00 դրամ,  աշխատանքի դիմաց ստացված վարձատրությունը կազմել է 14,613,599.00 դրամ,  ստացված վարկի մայր գումարի մնացորդի չափը՝ 22,065,862.00 դրամ:

ԱԺ բոլոր նստաշրջանների ընթացքում Խանդանյանը կողմ է քվեարկել 183 անգամ, դեմ՝ 9,  բացակայել է 84 անգամ, տվել է 2 հարց, ունեցել 2 ելույթ, հանդես եկել մեկ օրենսդրական նախաձեռնությամբ:

Խանդանյանի հանճարեղ մտքերի շարքից կարելի է առանձնացնել նրա երկու հարցազրույցները, որտեղ վերջինս խոսում է սատանիստներից և մարտի 8-ը վերաիմաստավորելու անհրաժեշտության մասին, կարծես հենց այդ նպատակով էլ հանրությունը վերջինիս և իր թիմակիցներին մանդատ է տվել և գործուղել ԱԺ։

Միակ նախաձեռնությունը, որով այս ընթացքում հանդես է եկել պատգամավորը, «Զանգվածային լրատվության մասին օրենքում» փոփոխությունների նախագիծն էր, որով սահմանվում է՝ չնույնականացված աղբյուրներին հղում տալու դեպքում ԶԼՄ-ն կրում է տեղեկատվության բովանդակության պատասխանատվությունը։ Այսինքն՝ հենց Խանդանյանի թեթև ձեռամբ է լրջորեն սահմանափակվել ԶԼՄ-ի գործունեության և ազատ խոսքի իրավունքը: