ՔՊ-ի «լռակյացները». ինչո՞վ է աչքի ընկել Կարեն Համբարձումյանը

Շարունակելով հանրության դատին ներկայացնել ՔՊ պառլամենտական խմբակցության՝ համեմատաբար պասիվ և հանրությանը իրենց բուռն օրենսդրական գործունեությամբ նվազ հայտնի պատգամավորներին՝ այսօր կանդրադառնանք Կարեն Համբարձումյանին:

Պատգամավորական մանդատը ստանձնելու պահի դրությամբ Կարեն Համբարձումյանի հայտարարագրած դրամական միջոցները կազմել են 1,000.00 ԱՄՆ դոլար, 3,500,000.00 ՀՀ դրամ, 960,000.00 ՀՀ դրամ և 8,918,400.00 ՀՀ դրամ: Այս տարի պատգամավորի ներկայացրած հայտարարագրից տեսնում ենք որ Համբարձումյանը հայտարարագրել է 3,000,000.00 և 5,500,000.00 ՀՀ դրամի համարժեք հանձնած և վերցրած փոխառություն, կանխիկ՝ 4,000,000.00 ՀՀ դրամ, 7,895,000.00 դրամի եկամուտ, 6,000,000.00 դրամի չափով ստացված վարկերի մայր գումարի մնացորդ:

Ինչո՞վ է աչքի ընկել Համբարձումյանը ԱԺ-ում: Վերջինս կողմ է քվեարկել 225 անգամ, բացակայել է 37 անգամ,  տվել է 0 հարց, ունեցել 0 ելույթ, հանդես եկել 0 օրենսդրական նախաձեռնությամբ:

Փոխարենը Համբարձումյանը անչափ ակտիվ է եղել տարատեսակ սկանդալների կիզակետում հայտնվելու տեսանկյունից: Դիցուք՝ ամիսներ առաջ հերթական ԽԾԲ-ին ականատես եղանք, երբ «Հայանտառ» ՊՈԱԿ-ի «Սիսիանի անտառտնտեսություն» մասնաճյուղի տնօրեն նշանակվեց Տիգրան Համբարձումյանը, որը ՔՊ-ական սիսիանցի պատգամավոր Կարեն Համբարձումյանի հարազատ եղբայրն է։

Բացի այդ, Համբարձումյանի անունը այս ամիսների ընթացքում բազմիցս է հնչել կապված Սիսիանում ՔՊ ներսում ծագած խժդժությունների հետ: Բանն այն է, որ Համբարձումյանը այստեղ զբաղված էր իր ազգական համայնքապետի ԺՊ Արմեն Հակոբջանյանի լոբբինգով, ինչը դուր չէր եկել ՔՊ գաղափարական թևին, քանի որ թե՛ Համբարձումյանը, թե՛ Հակոբջանյանը նախկին ԲՀԿ-ականներ են և երբեք էլ երդվյալ ՔՊ-ական չեն եղել: Սակայն, այսօր Սիսիանում փորձում են ամեն բան պահել իրենց վերահսկողության տակ:

 Աժ-ում բուռն գործունեությամբ աչքի չընկած Համբարձումյանը բավականին ակտիվ էր տարատեսակ վեճերում և կռիվներում։