Ուր է անհետացել Աշտարակի՝ «հոգով-սրտով» ՔՊ-ական դարձած համայնքապետ Թովմաս Շահվերդյանը

Աշտարակի՝ մեծ շուքով, երգով ու փիառով ընտրված քաղաքապետ Թովմաս Շահվերդյանը կորել է: Իհարկե, ոչ ֆիզիկապես, այլ ընդամենը հանրային և հրապարակային քաղաքական դաշտից: Բանն այն է, որ ոչ վերջինիս ՖԲ էջում, ոչ էլ քաղաքապետարանի էջում քաղաքապետի մեգա ակտիվության շունչն անգամ չի զգացվում:  Շահվերդյանը շնորհավորել է քաղաքացիների Ամանօրն ու Սուրբ ծնունդը, շնորհակալություն է հայտնել իրեն վստահելու և ընտրելու համար, իբրև իրական ջենթլմեն շնորհավորել է կանանց և աղջիկների Մարտի 8-ը և վերջ: Քաղաքապետարանի ՖԲ էջից էլ պարզ է դառնում, որ այնպես չէ, որ կառույցը պարապուրդի է մատնված, բնավ, պարզապես առավել մեծ ակտիվություն ցուցաբերում  է ոչ թե քաղաքապետը՝ ինչպես սպասվում էր, այլ, օրինակ, ավագանու անդամները, փոխքաղաքապետը:

Շահվերդյանի անունը ընտրություններից հետո հնչեց մամուլում մեկ անգամ, այն էլ սկանդալային պատմության ֆոնին: Դրանից հետո քաղաքապետի ակտիվությունը կտրուկ նվազել է, ինչը դժվար թե հասկանալի լինի Աշտարակի բնակիչների համար, որոնց մեծ մասը գնացել էր ընտրատեղամաս և ձայնը տվել հենց Շահվերդյանին: ՔՊ-ական քաղաքապետերին, ի դեպ, բնորոշ է նախընտրական շրջանի մեգաակտիվությունից հետո կորչել, երբ արդեն ընտրված են և հասարակության հետ հետադարձ կապի, հաշվետու լինելու որևէ պարտավորություն իրենց առաջ չեն զգում: 

Աշտարակի համայնքապետարանի կայքից պարզ է դառնում, թե ինչ բուռն գործունեությամբ է այս մեկ տարվա ընթացքում աչքի ընկել Թովմաս Շահվերդյանը: Դիցուք՝ բազմիցս քննարկվել է համայնքի կոմունալ ծառայությունների բարելավման ծրագիրը, ինչից սակայն պարզ չի դառնում՝ այդ ծառայությունները ի վերջո բարելավվել են, թե սահմանափակվել են քննարկումներով: Անց են կացվել ավագանու հերթական նիստերը, վարչապետի գավաթի խաղարկությունը, երիտասարդական միջոցառումներ: Ոչ մի խոսք մեծածավալ շինարարական աշխատանքների, իրականացված ծրագրերի կամ համայնք բերած ներդրումների մասին: Ի դեպ, իրենք՝ աշտարակցիներն էլ, կարծես թե, բազմաթիվ հարցեր ունեն Շահվերդյանին՝ կապված վերջինիս արդյունավետ աշխատանքի հետ։

Մինչդեռ մինչ ՏԻՄ ընտրությունները Շահվերդյանը հայտարարում էր բառացիորեն հետևյալը, որ այժմ, երբ Աշտարակը դառնում է խոշորացված համայնք, իր և իր թիմի առջև դրված խնդիրն Աշտարակ խոշորացված համայնքը կայուն զարգացող, դրանում ներառված բոլոր բնակավայրերի համար հավասար հնարավորություններ ապահովող ուժեղ համայնք դարձնելն է։ Թե որքանով է Շահվերդյանը մոտեցել իր այդ խոստման իրականացմանը՝ կարելի է դատել հենց պաշտոնական տվյալներից, որոնցում բնավ արտացոլված չեն Աշտարակի կայուն զարգացման ուղղությամբ համայնքապետի գործադրած ջանքերը...