Քլինթոնը խիստ հիասթափված է Հունգարիայից Սաֆարովի արտահանձնման պատճառով

Պետդեպարտամենտի աղբյուրները հինգշաբթի հաստատել են, որ Հունգարիայի արտաքին գործերի նախարար Յանոս Մարտոնյիի՝ այս շաբաթ Վաշինգտոն կատարած այցի ժամանակ պետքարտուղար Հիլարի Քլինթոնն ԱՄՆ-ի կառավարության խիստ հիասթափությունն է արտահայտել Հունգարիայի կողմից դատապարտված ադրբեջանցի կացնահար Ռամիլ Սաֆարովի արտահանձնման առնչությամբ. գրում է Asbarez-ը:

Վաշինգտոնում H1 Հայկական հեռուստաընկերության լրագրող Հայկարամ Նահապետյանի հարցին ի պատասխան՝ Պետդեպարտամենտի խոսնակը նշել է. «Պետքարտուղար Քլինթոնը վերահաստատել է մեր խոր հիասթափությունն այն բանի առնչությամբ, որ Հունգարիան արտահանձնել է դատապարտված մարդասպան Ռամիլ Սաֆարովին Ադրբեջանին, որտեղ նրան անմիջապես ներում է շնորհվել: Այդ որոշումը վնասակար էր Հայաստանի և Ադրբեջանի միջև խաղաղության գործընթացի և կողմերի միջև վստահության կառուցման համար»:

Նշենք, որ ԱՄՆ-ն առաջիններից էր, որ մտահոգություն հայտնեց Հունգարիայի կողմից արտահանձնման, ինչպես նաև նախագահ Իլհամ Ալիևի կողմից հայազգի Գուրգեն Մարգարյանին քնած ժամանակ դաժանորեն կացնահարած և դատապարտված ադրբեջանական բանակի զինծառայող Ռամիլ Սաֆարովի ներման և մասնագիտական առաջխաղացման կապակցությամբ:

Հունգարիան գիտեր Սաֆարովի ազատ արձակման հետևանքները։ Համաշխարհային հանրության կասկածանքներն այն մասին, որ Հունգարիան տեղյակ էր Ադրբեջանի՝ Սաֆարովին ներում շնորհելու մտադրության մասին, հաստատվեցին կացնահարի արտահանձնումից քիչ անց:

Reuters-ը հայտնեց, որ Հունգարիայի վարչապետ Վիկտոր Օրբանը հայտարարել է. «Արտաքին գործերի նախարարությունը ճշգրիտ կերպով կանխատեսել էր, թե ինչ հետևանքներ կարող է ունենալ այս կամ այն որոշումը: Մեր որոշումից հետո չի կատարվել որևէ բան, ինչը նախապես չի հաշվարկվել»:

Հունգարական ընդդիմությունը դատապարտեց Վիկտոր Օրբանի գործողությունները՝ որակելով դրանք որպես «բարոյապես սնանկ»:

Չնայած միջազգային քննադատությանը ԱՄՆ-ի, Ֆրանսիայի, Ռուսաստանի և ՆԱՏՕ-ի կողմից՝ Ադրբեջանի նախագահ Իլհամ Ալիևը շարունակում է հանդուգն վարմունք ցուցաբերել՝ չփոխելով էթնիկ հողի վրա Գուրգեն Մարգարյանին կացնահարած Ռամիլ Սաֆարովին ներում շնորհելու, նրան առաջխաղացում ապահովելու և ֆինանսապես պարգևատրելու իր որոշումը: