Մինի-մենամարտեր կառավարությունում. Անահիտ Ավանեսյան- Լենա Նանուշյան

Որքան էլ, որ ՔՊ-ի ներսում փորձում են տպավորություն ստեղծել, որ ներթիմային որևէ լարվածություն տեղ չունի հեղափոխականների շրջանում, մի բան ակնհայտ է, վերջին շրջանում ՔՊ-ական տարբեր պաշտոնյաներ չեն թաքցնում նույնիսկ միմյանց հանդեպ ունեցած վերաբերմունքը:

Դիցուք՝  նախարարություններում, ինչպես և մյուս գերատեսչություններում, հաճախ կարելի է հանդիպել նախարար-փոխնախարար հարաբերություններում առկա որոշ լարվածությանը, որը գուցե և չի արտահայտվում միմյանց հանդեպ բացահայտ դեմարշով, սակայն փոխադարձ կսմիթներն ու կադրային քաղաքականությունում յուրայիններին առաջ տանելու ցանկությունը ավելի քան ակնհայտ են:

Դիցուք՝ ամիսներ առաջ համացանցը զարմացրել էր առողջապահության փոխնախարար Լենա Նանուշյանի գրառումը, որտեղ նա, ըստ էության, ծաղրում էր իր ղեկավարի՝ Անահիտ Ավանեսյանի հայտնի աղային ռեֆորմը:   Նա ֆեյսբուքյան իր էջում զվարճալի տեսանյութ էր հրապարակել, որը Տիկ-տոկից է, որն արել էր մի տիկտոկեր։ Տեսանյութում տիկտոկերը հանրային սննդի օբյեկտում է, և երբ ձեռքն է վերցնում աղամանը, դիմացը «հայտնվում» է Անահիտ Ավանեսյանը։ Տեսանյութը փոխնախարարը վերնագրել էր ․ «Աղի իրազեկման միջազգային շաբաթվա ամենադիպուկ վիդեոն»։ Զարմանալի է, որ մի ամբողջ գերատեսչության փոխնախարար տիկ-տոկյան տեսանյութը, ոչ միայն որակում  է ամենադիպուկը, այլև այդ կերպ, ըստ էության, միանում է նախարարի՝ հանրային քննարկման ներկայացրած նախագծի վերաբերյալ արված հումորներին։

Կադրային քաղաքականությունում այս մինի հակամարտությունը նույնպես իր արտահայտումն է ստացել: Դիցուք՝ հեղափոխությունից հետո  Նիկոլ Փաշինյանի որոշմամբ՝ Լուսինե Քոչարյանը նշանակվել էր առողջապահության նախարարության գլխավոր քարտուղար։ Համաձայն մամուլում առկա տեղեկությունների՝ վերջինիս հովանավորյալը հանդիսացել էր  ՀՀ Առողջապահության նախարարի տեղակալ Լենա Նանուշյանը, իսկ Լուսինե Քոչարյանը եղել է ԱՆ բժշկական քաղաքականության վարչության պետ, ապա աշխատակազմի ղեկավար, հետո էլ մրցույթով նշանակվել է որպես Առողջապահության նախարարության գլխավոր քարտուղար։ Սակայն, Անահիտ Ավանեսյանի նախարար նշանակվելուց հետո Նանուշյանի կադրը հեռացավ զբաղեցրած պաշտոնից և այդ պաշտոնում նշանակվեց արդեն Անահիտ Ավանեսյանի ընկերուհին՝ Վարդուհի Գրիգորյանը: 

Սակայն, Ավանեսյանը այսքանով, կարծես թե, չի ցանկանում սահմանափակվել: Շատ է խոսվում այն մասին, որ  փոխնախարար Գեւորգ Սիմոնյանի՝ Երեւանի փոխքաղաքապետ նշանակվելուց հետո առողջապահության փոխնախարարի պաշտոնը թափուր է։ Մի շարք տեղեկությունների համաձայն՝ նախարար Անահիտ Ավանեսյանը պատրաստվում է այդ պաշտոնին նշանակել իր ընկերուհուն՝ առողջապահության նախարարության գլխավոր քարտուղար Վարդուհի Գրիգորյանին։

Ահա այսպիսի մինի-մենամարտեր են տեղի ունենում նախարարությունում, որոնք, սակայն, հաճախ առաջին հայացքից կարող են աննկատ մնալ և կարող է տպավորություն ստեղծվել, որ հեղափոխականների ղեկավարած կառույցներում իսկապես սոլիրդարություն  և իդիլիկ մթնոլորտ է տիրում: Ցավոք, ինչպես տեսնում ենք, իրականությունը լրիվ այլ է:

Շարունակելի...