Ստեփանավանի ՔՊ-ական համայնքապետի «կայսերական» խոստումները գրվել են սառույցին

Նախորդ տարի դեկտեմբերին Ստեփանավանում կայացած ՏԻՄ ընտրություններում հաղթել է «Քաղաքացիական պայմանագիրը»՝ ստանալով քվեների մոտ 78,4 %-ը։ ՔՊ կուսակցության ընտրացուցակը գլխավորում էր Ստեփանավանի ներկայիս ղեկավարի ժամանակավոր պաշտոնակատար Արմեն Գրիգորյանը։ Այս համայնքում ընտրություններին մասնակցում էին նաև «Բարգավաճ Հայաստան» կուսակցությունը, որը հավաքել էր 13,8 % ձայն, և «Հայ ազգային կոնգրեսը»՝ 4,2 %։

ՔՊ-ական պատգամավորներ Արփի Դավոյանը եւ մյուսները մի քանի շաբաթ շարունակ՝ հայրենի Ստեփանավանում ակտիվ նախընտրական քարոզարշավ էին իրականացնում, որպեսզի Ստեփանավանը ձեռքից բաց չթողնեն։ Ստացվեց: Սակայն, դիտարկենք, թե այս մեկ տարվա մեջ ինչ հաջողությունների է հասել Արմեն Գրիգորյանն իր պաշտոնում:

Ընտրություններից առաջ տված իր հարցազրույցներում և ստեփանավանցիների հետ ունեցած նախընտրական հանդիպումների ընթացքում Գրիգորյանը կապիտալ շինարարություն էր խոստանում, նոր աշխատատեղերի հիմնում, համայնքային նախկին իշխանությունների կողմից կատարված չարաշահումների բացահայտում, և սպառնում էր թույլ չտալ նախկինների վերադարձը: Դասական հեղափոխական խոստում, ինչպես ասում են:

Իսկ այժմ անցնենք փաստերին: Ստեփանավանի համայնքապետարանի պաշտոնական կայքից տեղեկանում ենք, թե ինչ բուռն գործունեություն է այս ընթացքում ծավալել համայնքապետը: Նա շնորհավորել է երիտասարդների միջքազգային տոնը, հանդիպել ԱԻՆ նախարարի տեղակալի հետ, դրիֆտ ավտոմեքենաների ցուցադրությանն է հետևել, համայնքապետի մասնակցությամբ նշվել է «Ծաղկի տոնը»-ը,  Գրիգորյանը նաև մասնակցել է շաբաթօրյակին, շնորհավորել է ոստիկանների օրը, Գրիգորյանը ընդունել է չինացի գործարարներին, որոնց հետ քննարկվել է Կաթնաղբյուր համայնքում հանքային ջրերի գործարանի կառուցման հարցը, սակայն այդպես էլ հայտնի չէ, թե որ փուլում է գտնվում այս գործընթացը,  Արմեն Գրիգորյանն ընդունել էր նաև Չեխիայից Հայաստան ժամանած պատվիրակության ներկայացուցիչներին, որոնք հետաքրքրված են Ստեփանավանի օդանավակայանով և նախատեսում են մեծ ներդրումներ իրականացնել: Այդ հանդիպումից հետո էլ չկա որևէ ինֆորմացիա, որ սայլը տեղից շարժվել է:

Ինչպես տեսնում ենք, չնայած կարկառուն ՔՊ-ականների, մասնավորապես՝ Արփի Դավոյանի և Սուրեն Պապիկյանի կողմից իրականցված ակտիվ լոբբինգի և դրա արդյունքում շուրջ 80 տոկոս քվե հավաքելուն՝ Արմեն Գրիգորյանը մեկ տարվա ընթացքում չի կատարել իր տված խոստումներից և ոչ մեկը, թերևս միայն բացի մեկից՝ նախկինների վերադարձը կասեցնել նրան, այնուամենայնիվ, հաջողվել է: Սակայն, եթե Գրիգորյանը շարունակի ղեկավարել այս ոճով, ապա հնարավոր է հաջորդ ՏԻՄ ընտրություններին հիասթափված ստեփանավանցիներն իրենք վերադարձնեն վերջիններիս...