Լիտվան դարձել է ռեսուրս թրաֆիքինգի համար. Լիտվայի ՆԳՆ

Լիտվայի քաղաքացիներն օգտագործվում են հարկադիր աշխատանքի, սեռական շահագործման, կեղծ ամուսնությունների և խարդախության համար։ Այս մասին հայտարարել է Լիտվայի ներքին գործերի նախարարությունը, հայտնում է Sputnik Լիտվան։ ՆԳՆ-ն ընդգծել է, որ Լիտվան ռեսուրսային, տարանցիկ և որպես նպատակակետ հանդիսացող երկիր է մարդկանց թրաֆիքինգի համատեքստում։

«Լիտվայի քաղաքացիները օտար երկրներում օգտագործվում են թրաֆիքինգի, հանցավոր գործողությունների, հարկադիր աշխատանքի, սեռական շահագործման, կեղծ ամուսնությունների, խարդախության և մուրացկանության համար», - ասել է Ներքին գործերի նախարար Ագնե Բիլոտայտեն:

Նրա խոսքով՝ Լիտվայում երրորդ երկրների քաղաքացիներին հարկադիր աշխատանքի են ենթարկում անմարդկային պայմաններում, իսկ «կանայք մերսման սրահներում ենթարկվում են սեռական շահագործման՝ առանց ընտրության իրավունքի»։

Բիլոտայտեն հավելել է, որ ինչ վերաբերում է Ուկրաինայից Լիտվա ժամանած փախստականներին, Բալթյան Հանրապետությունն անմիջապես ձեռնարկել է բոլոր անհրաժեշտ կանխարգելիչ միջոցները՝ նրանց մարդկանց թրաֆիքինգի վտանգներից պաշտպանելու համար։

Ապրիլին Լիտվայի գլխավոր դատախազությունը հայտնել էր, որ Ուկրաինայից երեխաների հնարավոր թրաֆիքինգի փաստով նախաքննություն է տարվում։