Արկադի Փելեշյանը տապալել է Վանաձորի կառավարումը. ՔՊ-ի ներսում դժգոհություն է հասունանում

Վանաձորի համայնքապետարանում ճգնաժամը խորանում է. վարչական դատարանը, դատավարության կողմերից մեկի պատշաճ չծանուցված լինելու հիմքով, հետաձգել է Վանաձորում համայնքի ղեկավարի ընտրության օրակարգով նիստեր գումարելու արգելքը վերացնելու պահանջով՝ խմբակցությունների հայցի քննությունը։ Դատական նիստի մասին ծանուցված չի եղել ավագանու «Ապրելու երկիր» խմբակցությունը։ Վանաձորում իրավիճակի հանգուցալուծումը, ըստ բազմաթիվ փորձագետների, արտահերթ ընտրությունների անցկացումն է։ 

Իշխող ՔՊ խմբակցությունը, իբրև խնդրի լուծում, արտահերթ նիստով փոփոխություններ կատարեց ՏԻՄ մասին օրենքով, որով վարչապետին համայնքապետի ԺՊ նշանակելու լիազորություն տրվեց, ինչից հետո Նիկոլ Փաշինյանի որոշմամբ՝ Արկադի Փելեշյանը նշանակվեց Վանաձորի համայնքապետի պաշտոնակատար: Բայց, ինչպես երևում է, հայտնի Ակկան էլ իր կապերով չի կարողանում օգնել ՔՊ-ին: Մինչդեռ Փաշինյանի և ՔՊ-ի ստավկան հենց դրա վրա էր, որ վերջինս իր կիսաքրեական կապերով, ռեսուրսներով կօգնի համայնքն իրենցով անելու գործում, այն էլ Փելեշյանը տապալեց առաջին իսկ քննությունը. նիստը չի կայացել, իսկ բյուջեն մնում է օդից կախված: Մեկ տարի առաջ խոշորացած համայնքն աշխատում է նախորդ տարվա բյուջեով, Վանաձորին միացած բնակավայրերը վարչական ղեկավարներ չունեն։ Բայց արդեն հաջորդ տարվա համար օրենքները ժամանակավոր կառավարման որևէ հնարավորություն չեն տալիս՝ առանց բյուջեի հաստատման։ Անցած տարվա խոշորացումից հետո Վանաձորում որևէ խոշոր ծրագիր չի արվել։ Աղբահանությունը հատկապես քաղաքի ծայրամասերում և Վանաձորին միացած գյուղական բնակավայրերում չի գոհացնում, որոշ ճանապարհներ արդեն անանցանելի են: Սակայն համայնքապետարանը համայնքապետով հանդերձ պարապուրդի է մատնված, փոխարենը՝ ակտիվորեն ՀԱՍԿ-ի իր թիմակիցներին և նախկինում իր հետ աշխատած անձանց աշխատանքի է տեղավորում համայնքապետարանում:

Անշուշտ, որքան էլ որ զավեշտալի չհնչի, սակայն այս իրավիճակում ակնհայտորեն փառավորվում է Լոռու մարզպետ Արամ Խաչատրյանի հոգին, քանի որ վերջինս էր հենց Վանաձորում ՔՊ քաղաքապետի թեկնածուն, սակայն ընտրություններում պարտվելուց հետո Փաշինյանը նրան այլևս չվստահեց և նախընտրեց Փելեշյանին: Այժմ, երբ Փելեշյանը չի արդարացնում Փաշինյանի հույսերը, մարզպետը կարող է օգտվել ստեղծված իրավիճակից: Եվ դրա առաջին ծիծեռնակները արդեն իսկ երևում են: Այսպես ասած՝ քայլած ՔՊ-ականները, Լոռու ՔՊ խորհուրդը, ակտիվ կուսակցականները այնքան էլ գոհ չեն, որ հեղափոխության հաղթանակի մեջ իրենց լուման ունեցած ակտիվիստների փոխարեն Փաշինյանը պաշտոններ է բաշխում նախկին իշխանության կարկառուն, դեռ մի բան էլ՝ կիսաքրեական աշխարհի հետ կապեր ունեցող անձանց: Ակնհայտ է, որ եթե տեղի ունենան նոր ընտրություններ, ՔՊ-ականներն անելու են ամեն բան, որպեսզի Փաշինյանի ընտրությունը կանգ առնի կուսակցականներից որևէ մեկի և ոչ թե Արկադի Փելեշյանի վրա։