Զելենսկին հայտնել է` երբ կարող է ավարտվել պատերազմը

Ռուսաստանի և Ուկրաինայի միջև պատերազմը կարող է ավարտվել հաջորդ տար։ Այս մասին հայտարարել է Ուկրաինայի նախագահ Վոլոդիմիր Զելենսկին, փոխանցում է Politico-ն։

Պարբերականը նաև Ուկրաինայի ղեկավարին անվանել է Եվրոպայի ամենաազդեցիկ անձը։ «Կարծում եմ, որ ուկրաինացիները նույնպես կլինեն ամենաազդեցիկները հաջորդ տարի, բայց արդեն խաղաղ ժամանակներում», - ասել է Զելենսկին՝ շնորհակալություն հայտնելով Եվրամիությանն աջակցության համար։

Երեկ ամերիկյան Time ամսագիրը Վոլոդիմիր Զելենսկին անվանել է 2022 թվականի «տարվա մարդ»։ Այս տարվա մայիսին Զելենսկին Time ամսագրի ընթերցողների կողմից ճանաչվել է «տարվա ամենաազդեցիկ մարդը»։ Հարցման ընթացքում նրանք քվեարկել են այն մարդկանց օգտին, ովքեր արժանի են տեղ ունենալու տարվա ամենաազդեցիկ մարդկանց ամենամյա ցուցակում։

Հիշեցնենք, որ Զելենսկին G20-ի գագաթնաժողովում իր տեսաուղերձում առաջ է քաշել տասը պայման, որից հետո հնարավոր է խաղաղության պայմանագիր կնքել։ Ի պատասխան՝ Ռուսաստանի նախագահի մամուլի քարտուղար Դմիտրի Պեսկովն ասել է, որ բանակցություններ սկսելու համար Ուկրաինայի ղեկավարի առաջ քաշած բոլոր կետերը խոսում են ուկրաինական կողմի՝ դիվանագիտությունից հրաժարվելու մասին։