ԱՄՆ-ն «կտաքացնի» մարտերն Ուկրաինայում առնվազն մինչև 2025 թվականի վերջ. Զախարովա

ԱՄՆ-ն նախատեսում է ուկրաինական հակամարտությունը խթանել առնվազն մինչև 2025 թվականի վերջ՝ կոռուպցիոն սխեմաների միջոցով գումար վաստակելու համար, ասել է ՌԴ ԱԳՆ պաշտոնական ներկայացուցիչ Մարիա Զախարովան, գրում է Ռիա Նովոստին։

«Նրանք իրենք են դա պլանավորում՝ հիմնվելով այն փաստաթղթերի վրա, որոնք ոչ մեկից չեն թաքցնում»,- ասել է նա։

Ամերիկյան ԶԼՄ-ները, ըստ նրա, արդեն իսկ զզվում են «Սպիտակ տուն - Կիև - Սպիտակ տուն» կոռուպցիոն մարաթոնի մանրամասներից։ Դրանով է բացատրվում ԱՄՆ նախագահ Ջո Բայդենի վարչակազմի ցանկությունը՝ Կոնգրեսին ստիպել 2023 թվականի բյուջեում ներառել Կիևին 37 մլրդ դոլարի լրացուցիչ օգնության գումարը, ասել է դիվանագետը։

Ինչպես նշել է Զախարովան, այդ գումարի զգալի մասը կուղղվի ուկրաինական բանակի կարիքներին, իսկ հետո կորոշվի, թե դրամական օգնությունից որն է «խորտակվելու» եվրոպական, համաշխարհային բանկերում և մասնավոր ֆոնդերում։

«Ամերիկյան իշխանությունների և Raytheon-ի միջև կնքված եռամյա պայմանագիրը, Կիևի համար հակաօդային պաշտպանության համակարգեր գնելու համար 1,2 միլիարդ դոլարի չափով, տեղավորվում է նույն տրամաբանության մեջ»,- ընդգծել է Զախարովան։