Վարկային կազմակերպությունից՝ փոխմարզպետ. ինչով է հայտնի Նարեկ Ղուշչյանը

2021 թվականին Տավուշի փոխմարզպետի պաշտոնում նշանակվեց Նարեկ Ղուշչյանը, ով մինչ այդ երկար տարիներ շարունակ աշխատել էր Իջևանի համայնքապետարանում, իսկ այնուհետև՝ մինչ հեղափոխությունը ՖԻՆՔԱ ՈՒՎԿ-ում:

Ղուշչյանը թերևս ամենա քիչ աչքի ընկնող փոխմարզպետներից է, նա բավական հազվադեպ է հանդիպումներ ունենում և հիմնականում գտնվում է մարզպետ Ղալումյանի ստվերում: Եվ դա պարզ է․ Ղալումյանը, դժվար թե, հանդուրժեր իր տեղակալի չափից ավել ընդգծված ակտիվությունը:

Ղուշչյանի անունը վերջերս էր հնչել՝ կապված Երևանում պատանուն վրայերթի ենթարկելու հետ: Հոկտեմբերի 23-ին վրաերթ էր տեղի ունեցել Երևանում։ Ժամը 16․40-ի սահմաններում 41-ամյա Նարեկ Ղուշչյանը Nissan մակնիշի 550 LL 60 համարանիշի ավտոմեքենայով Ռուբինյանց փողոցում վրաերթի էր ենթարկել 20-25 տարեկան մի տղայի։ Վարորդը փախուստի չէր դիմել, օգնել էր վրաերթի ենթարկվածին և իր ավտոմեքենայով տեղափոխել Իզմիրլյան բժշկական կենտրոն։

Պաշտոնյան նաև բավական ուշագրավ հայտարարագիր է ներկայացրել։ Պարզվում է՝ նա 2016 թվականին Իջևանում որպես նվիրատվություն բնակարան է ստացել: Իսկ նրա եկամուտները կազմել են 33,000.00 ռուսական ռուբլի և 9,972,349.00 դրամ

Փոխմարզպետի կնոջ՝ Աննա Ալիխանյանի հայտարարագրից տեղեկանում ենք, որ վերջինս Երևանի կենտրոն համայնքում բնակարան է ձեռք բերել, սակայն հայտնի չէ, թե երբ է կատարվել գնումը: Բացի այդ, նա 2018-ին որպես նվիրատվություն է ստացել ավտոմեքենա, 5,843,500.00 դրամի բանկային արժեթուղթ է ձեռք բերել, բացի այդ 22,738.00 դրամի վարկ է վերցրել: