Վարկային մասնագետը՝ փոխմարզպետ. ինչով է աչքի ընկել Գոռ Ասրյանը

Շարունակելով ընթերցողների ուշադրությանն ու դատին ներկայացնել հեղափոխական Հայաստանի փոխմարզպետների՝ հիմնականում ստվերում գտնվող գործունեությունը, այսօր կանդրադառնանք Լոռու փոխմարզպետ Գոռ Ասրյանին: Վերջինս մինչ հեղափոխությունը երկար տարիներ աշխատել է վարկային սեկտորում: Դիցուք՝ 2008- 2013թթ. աշխատել է «ՖԻՆՔԱ» ՈՒՎԿ ՓԲԸ «Ստեփանավան» մասնաճյուղում՝  որպես վարկային մասնագետ:  2013-2019թթ. աշխատել է «ՖԻՆՔԱ» ՈՒՎԿ ՓԲԸ «Ստեփանավան» մասնաճյուղում՝  որպես ավագ վարկային մասնագետ: «ՖԻՆՔԱ» բրենդը անվերապահորեն կրելու և սկզբունքներին հետևելու համար 2015թ. պարգևատրվել է շնորհակալագրով։ 28.12.2020թ. -ին ՀՀ վարչապետի 14440-Ա որոշմամբ նշանակվել է ՀՀ Լոռու մարզպետի տեղակալ:

Ի տարբերություն մյուս փոխմարզպետների, ովքեր հիմնականում գտնվում են մարզպետների ստվերում և նկատելի պասիվ են մարզպետներից, Ասրյանը՝ հակառակը, կարծես թե, փորձում է աչքի ընկնել իր ակտիվությամբ, հատկապես Վանաձորում մարզպետ Խաչատրյանի լրջագույն սայթաքումից հետո, որը, ըստ շատերի, Փաշինյանը նրան դեռևս չի ներել: 

Սակայն, էլ ինչ ակտիվություն՝ առանց սկանդալների: Ընդամենը օրեր առաջ Վանաձորի թիվ 1 պոլիկլինիկայի աշխատակիցները բողոքի ցույց էին անում: Վերջիններս պահանջում են, որ երեկ աշխատանքից ազատված իրենց տնօրենը վերականգնվի պաշտոնում: Նրանց հայտարարություններից երևում էր, որ նոր տնօրենը մարզպետարանի սրտով է և նրա նշանակումը հովանավորվում է հենց մարզպետարանից: Լրագրողների պոլիկլինիկայում գտնվելու պահին փոխմարզպետ Գոռ Ասրյանը եւ մարզպետարանի մի քանի աշխատակիցներ տնօրենի առանձնասենյակում արդեն նախկին տնօրեն Սյուզաննա Բալայանի հետ վերջին անգամ այսպես ասած՝ հանձնում-ընդունում էին անում՝ տնօրենի պաշտոնին նշանակելով Անահիտ Դարբինյանին, որը Վանաձորի բժշկական կենտրոնի ախտորոշիչ բաժանմունքի վարիչն է:

Իսկ պոլիկլինիկայի աշխատակիցները դիմեցին շենքից հեռացող փոխմարզպետին. «Եվ ձեր նմանները պետք է ղեկավարեն մեզ»: «Ո՞վ էր ասողը, դուք ինձ անձնապես ճանաչո՞ւմ եք, որ նման վիրավորանք եք տալիս»,-արձագանքեց Գոռ Ասրյանը:

Մամուլը հաճախ է գրում, որ Վանաձորյան ֆիասկան Փաշինյանը մարզպետ Խաչատրյանին ոչ միայն չի ների, այլ նաև վերջինիս պատրաստվում է ազատել զբաղեցրած պաշտոնից: Մարզպետի պաշտոնի հավակնորդներից մեկն էլ, ի թիվս այլ ՔՊ-ականների, փոխմարզպետ Գոռ Ասրյանն է, ով, ինչպես նշեցինք,  նկատելիորեն ակտիվացել է, սուբվենցիոն ծրագրերի իրականացման գործընթացին է հետևում, մարզում սպորտային միջոցառումներ է կազմակերպում, բնապահպանական խնդիրներ է լուծում: Ստվերում գտնվող Խաչատրյանի ֆոնին փոխմարզպետի նման ակտիվացումը, իհարկե, պատահական չէ․ կադրային սովի պայմաններում շատ հավանական է, որ Փաշինյանի ընտրությունը ի վերջո կանգ առնի արդեն իսկ մարզում աշխատանքի փորձ ունեցող Ասրյանի վրա:

Շատերի կարծիքով՝ նա մարզպետի հավակնորդ է նաև այն պատճառով, որ համարվում է ՊՆ նախարար Սուրեն Պապիկյանի մտերիմը: Լրագրողների աչքից չէր վրիպել, որ վերջին համապետական ընտրություններից առաջ Սուրեն Պապիկյանը Լոռու փոխմարզպետ Գոռ Ասրյանի, Ստեփանավանի տարածաշրջանի Ագարակ համայնքի վարչական ղեկավար Կարլեն Վերմիշյանի հետ, ում ինքն է նշանակել, թեպետ վերջինս կրթություն  էլ չի ունեցել նշանակման պահին, ինքնամոռաց Ստեփանավանում այս ու այն կողմ էր վազում, բուկլետ բաժանում ու գոռում՝ սիրելի «Նիկոլ վարչապետ» կարգախոսը:

Շարունակելի...