Ինչով է աչքի ընկել ՔՊ-ական սկանդալային փոխմարզպետը. Վահան Զարոյան

Շարունակելով ընթերցողների ուշադրությանը ներկայացնել հետհեղափոխական Հայաստանի փոխմարզպետների անցած ուղին և այն, թե ինչով են վերջիններս աչքի ընկել իրենց պաշտոնավարման ընթացքում՝ այսօր կանդրադառնանք Գեղարքունիքի մարզպետ Վահան Զարոյանին:

Այն, որ այս իշխանությունների կադրային բանկը ողբերգականորեն դատարկ է, թերևս, որևէ մեկի մոտ կասկած չի հարուցում, բայց որ կրկին փոխմարզպետի պաշտոնում կնշանակվի մեկը, ով ժամանակին նույն պաշտոնից ազատվել էր կոռուպցիոն թեմաների մեջ թաթախված լինելու համար, վեր է երևակայությունից։ Խոսքը նախորդ տարվա հունիսին Գեղարքունիքի փոխմարզպետ նշանակված Վահան Զարոյանի մասին է:

Այն, որ փոխմարզպետի պաշտոնում է նշանակվում մի անձ, ով դեռ պաշտոնյա ժամանակ ամենաայլանդակ հայհոյանքներն էր գրում սոցցանցերում, արդեն ախտորոշում է և խոսում է այս իշխանության արժեքային նվաստագույն համակարգի մասին։

Դեռևս խորհրդարանական ընտրություններից առաջ մամուլն անդրադարձել էր Վահան Զարոյանին, ով տեղ էր գտել Նիկոլ Փաշինյանի «Քաղաքացիական պայմանագիր»-ի (ՔՊ) նախընտրական ցուցակում։

Ըստ ԶԼՄ հրապարակումների` 2019 թվականին ՀՀ երկրորդ նախագահ Ռոբերտ Քոչարյանի դեմ ցույց իրականացնողների մեջ է եղել նաև Գեղարքունիքի մարզպետի նախկին տեղակալ, ՔՊ-ական Վահան Զարոյանը, ով 2018 թվականի հունիսի 27-ին նշանակվել էր տվյալ պաշտոնում, իսկ արդեն 2018 թվականի հոկտեմբերի 16-ին ազատվել էր աշխատանքից: Զարմանալի է, բայց նա ընդամենը 5 ամիս է պաշտոնին մնում։ Պարզվում է, սակայն, որ դա ուներ պատճառ։ Ըստ մամուլում շրջանառվող լուրերի՝ Զարոյանը փոխմարզպետի ցանկալի աթոռին հասնելու համար դիպլոմ է կեղծել, ինչի համար էլ Փաշինյանը հեռացրել է նրան զբաղեցրած պաշտոնից: Նրա նկատմամբ քրեական գործ է հարուցվում, ապա քրեական գործը կարճվում է համաներման հիմքով։

Հետո մասնակցում էր Վարդենիսի քաղաքապետի ընտրություններին, բայց աթոռին չհասավ, նա հավաքեց ընդամենը 504 ձայն, իսկ քաղաքապետ ընտրվեց Արամ Մելքոնյանը, ով Գեղարքունիքի մարզպետ Գնել Սանոսյանի համակուրսեցին է, ըստ մամուլի հրապարակումների, նրան հենց մարզպետն էր սատարում՝ «չեզոքացնելով» մյուս թեկնածուներին, դրա մասին բարձրաձայնում էին նաեւ թեկնածուները։ Իր հերթին Զարոյանը հայտարարել էր, որ ինքը ՔՊ անդամ է, սակայն իշխող կուսակցությունը իրեն չի սատարում: