Դեկտեմբերին գնաճը կարագանա. մեր կանխատեսումը տարվա համար 9-9.5 տոկոս է. Մարտին Գալստյան

Տնտեսություն 13 Դեկտեմբեր, 2022 18:41

ԿԲ կանխատեսումների համաձայն՝ գնաճի որոշակի արագացում կլինի դեկտեմբեր ամսին, սակայն՝ մի փոքր ավելի ցածր, քան նախկինում ակնկալվում էր։ Այս մասին, այսօր՝ դեկտեմբերի 13-ին, մամուլի ասուլիսում հայտարարեց ՀՀ ԿԲ նախագահ Մարտին Գալստյանը։

«Այս պահի դրությամբ մեր կանխատեսումը տարվա համար 9-9.5 տոկոսի միջակայքում է»,– ասաց ԿԲ նախագահը։

Գալստյանը նշեց, որ համաշխարհային տնտեսությունում շարունակվում է տնտեսական ակտիվության նվազումը։ Սակայն ՀՀ հիմնական գործընկեր երկրներում ընդլայնված պահանջարկի ու գնաճային սպասումների արդյունքում ձևավորված գնաճային միջավայրը դեռ պահպանվում է։

ԿԲ նախագահի խոսքով, զարգացած երկրների կենտրոնական բանկերը ևս գնաճը զսպելու համար առաջիկայում շարունակելու են խստացնել դրամավարկային պայմանները. «Գործընկեր երկրներում դրամավարկային պայմանների հետևողական խստացումը կնպաստի համաշխարհային պահանջարկի նվազմանը և միջազգային ապրանքահումքային շուկաներում գների որոշակի ճշգրտմանը։ Արդյունքում համաշխարհային տնտեսությունից ՀՀ տնտեսության վրա ակնկալվում է գնաճային ազդեցության թուլացում»,– ասաց նա` հավելելով, որ գնաճի որոշակի դանդաղում արդեն նկատվում է հատկապես ներմուծվող պարենային ապրանքների շուկայում։

Այդուհանդերձ, բարձր պահանջարկն ու գնաճային բարձր սպասումները դեռ շարունակում են որոշիչ լինել հայաստանյան գնաճի վարքագծում։

ԿԲ–ի կանխատեսմամբ` գնաճը Հայաստանում աստիճանաբար կնվազի` միջնաժամկետ հորիզոնում կայունանալով նպատակային 4-4.5 տոկոսի սահմաններում։

Գալստյանը շեշտեց, որ անհրաժեշտության դեպքում ԿԲ–ն կիրականացնի գնաճի զսպման անհրաժեշտ միջոցառումներ։

Հիշեցնենք` պաշտոնական տվյալներով՝ սպառողական շուկայում 12-ամսյա գնաճը (2022թ. նոյեմբերը 2021թ. նոյեմբերի նկատմամբ) կազմել է 8.8%: