Էրդողանը փորձում է քաոս ստեղծել Թուրքիայում. France 24

Թուրքիայի նախագահ Ռեջեփ Թայիփ Էրդողանը փորձում է քաոս ստեղծել Թուրքիայում՝ 2023 թվականի հունիսի ընտրություններում հաղթելու համար։ Այս մասին FRANCE 24 հեռուստաալիքին տված հարցազրույցում ասել է Cumhuriyet-ի նախկին գլխավոր խմբագիր Ջան Դյունդարը։

Դյունդարը 2016 թվականին հինգ տարվա ազատազրկման էր դատապարտվել՝ Սիրիայում ջիհադիստներին մաքսանենգ ճանապարհով թուրքական զենքի մատակարարման տեսանյութ հրապարակելու համար։ Նա փախել է Գերմանիա 2016 թվականին՝ դատավարության ընթացքում նրա դեմ մահափորձից հետո։

«Էրդողանը երկար ձեռքեր ունի Եվրոպայի և արևմտյան աշխարհի շատ երկրների վրա»,- ասել է Դյունդարը։ «Նա բլեֆ է անում՝ շանտաժի ենթարկելով եվրոպական կառավարություններին։ Նույնիսկ եթե ես ապրում եմ Գերմանիայում, ես ինձ լիովին ազատ չեմ զգում»:

«Էրդողանը դարձել է Թուրքիայի ամենախոշոր մեդիա մագնատը, ուստի լրատվամիջոցների սեփականատերն է: Նրան մոտ կանգնած գործարարները լրատվամիջոցները գնել են։ Լրատվամիջոցների գրեթե 80 տոկոսն այժմ վերահսկվում է Էրդողանի կողմից: Մնացածները կա՛մ սպառնալիքի տակ են, կա՛մ արդեն բանտում են։ Այսպիսով, մեզ մնում են միայն սոցիալական ցանցերն ու մնացած լրատվամիջոցները»,- բացատրել է Դյունդարը:

Թուրքիայի խորհրդարանի կողմից հոկտեմբերին ընդունված նոր օրենքի համաձայն՝ լրագրողներն ու սոցցանցերի օգտատերերը կարող են մինչև երեք տարվա ազատազրկման դատապարտվել «կեղծ լուրեր» տարածելու համար։ Դյունդարը նշել է, որ «ընտրություններին ընդամենը վեց ամիս է մնացել, և, սա, իհարկե, Էրդողանին հսկայական առավելություն է տալիս»։

Էրդողանը «ամեն ինչ անում է իշխանությունը պահպանելու համար և այդ պատճառով էլ փորձում է ռազմական գործողություն սկսել Սիրիայի դեմ։ Հենց երեկ նա սպառնացել է Հունաստանին։ Նա փորձում է քաոսի որոշակի մթնոլորտ ստեղծել, մարդկանց համոզել, որ երկրին ուժեղ առաջնորդ է պետք, ոչ թե կոալիցիոն կառավարություն»,- եզրափակել է Դյունդարը։