Պարապուրդի մատնված հանձնակատարը. Զարեհ Սինանյանը կրկին «լվանում է ձեռքերը» սփյուռքից

Ամիսներ առաջ մեծ շուքով համահայկական ֆորում կազմակերպած Սփյուռքի գործերի գլխավոր հանձնակատար Զարեհ Սինանյանը այսօր վերջապես որոշեց խոսել Լաչինի միջանցքի փակման հետևանքով առաջացած խնդիրների և դրանց լուծման ընթացքում սփյուռքի ներուժի համախմբման անհրաժեշտության մասին:

Սակայն, բանից պարզվում է, որ Սինանյանը իր կառույցի կողմից այդ համախմբմանը մասնակցելու որևէ առիթ կամ պատճառ չի տեսնում և սփյուռքին առաջարկում է գործել՝ «եղունգ ունեք՝ գլուխներդ քորեք» սկզբունքի համաձայն: Ըստ հանձնակատարի՝ ինքը ուղղակի կոչ չի անում սփյուռքի մեր կառույցներից բողոքի ակցիաներ իրականացնել օտար պետությունների դեսպանատների առջև՝ գտնելով, որ սփյուռքը ունի ներուժ և գործիքակազմ այդ ակցիաները ինքնուրույն իրագործելու համար: Իսկ իր կառույցի գլխավոր գործիքակազմը Սինանյանը համարում է տեղի ունեցող գործընթացների վերաբերյալ սփյուռքի մեր հայրենակիցներին տեղյակ պահելը: Ասել է թե, Սինանյանը և իր կառույցը ստանձնել են լրատվամիջոցի դեր, կարծես թե, ոչ թե Արցախն է գտնվում ադրբեջանցիների բլոկադայի, այլ սփյուռքն է գտնվում ինֆորմացիան բլոկադայի մեջ և տեղեկություններ ստանալու միակ աղբյուրը, իհարկե, հանձնակատարի գրասենյակն է:

Ինչպես հասկանում ենք՝ Զարեհ Սինանյանը կրկին անգամ ձեռքերը լվանում է սփյուռքից և գուցե դա նաև ինչ-որ տեղ սպասելի էր: Ի վերջո նրան հաջողվել է այնպիսի սեպ խրել Հայաստան-Արցախ-սփյուռք հարաբերությունների մեջ, որ դժվար էլ թե սփյուռքի մեր կառույցները ցանկություն ունենային աշխատել Սինանյանի ղեկավարած կառույցի հետ և դժվար էլ առանձնահատուկ հույսեր կապեին վերջինիս ունեցած գործիքակազմի հետ: Հետաքրքիր է միայն՝ իսկ ինչի համար է բյուջեից հարյուրավոր միլիոնների գումար դուրս գրվում Սինանյանի գրասենյակին, եթե հարկ եղած ժամանակ, վերջինս մշտապես լվանում է ձեռքերը և մի կողմ քաշվում, մաքսիմում կատարելով յուրահատուկ տեղեկատվական շտաբի գործառույթներ...