Ուկրաինայի Patriot-ները ևս կես տարի կլռեն. Politico

ԱՄՆ Կոնգրեսի Ներկայացուցիչների պալատի Զինված ծառայությունների հանձնաժողովի նախագահ Ադամ Սմիթը հայտարարել է, որ ուկրաինական զորքերը չեն կարողանա օգտագործել Patriot հակաօդային պաշտպանության համակարգերը ևս մոտ վեց ամիս՝ կապված այդ զինատեսակների հետ վարժության տեւողության հետ, հայտնում է Politico-ն։

«Patriot հակաօդային պաշտպանության համակարգը երկարաժամկետ խնդիր է։ Ուկրաինացիները առաջիկա վեց ամիսների ընթացքում չեն կրակի Patriot հակաօդային պաշտպանության համակարգից»,- ասել է նա։

Նյութում ասվում է, որ ԱՄՆ Զինված ուժերի կարևոր խնդիրն այժմ ուկրաինացի զինվորականների՝ բարդ սպառազինությունների հետ աշխատելու պատրաստությունն է։ Մեկ Patriot մարտկոցը գործարկելու և պահպանելու համար կարող է պահանջվել մինչև 90 զինծառայող, իսկ ուսուցումը կարող է տևել մի քանի ամիս:

Ավելի վաղ ԱՄՆ ծովային հետևակի հետախուզության պաշտոնաթող սպա Սքոթ Ռիթերը հայտարարել էր, որ առանց ամիսներ տևող նախնական պատրաստության՝ Ուկրաինայի զինված ուժերը չեն կարողանա օգտագործել Patriot զենիթահրթիռային համակարգերը, որոնց տեղափոխումը Կիև առաջիկա օրերին կարող է հայտարարել Վաշինգտոնը։

Մինչ այս Սպիտակ տան մամուլի քարտուղար Կարին Ժան Պիերը հայտարարել էր, որ ԱՄՆ-ն չի պատերազմում Ռուսաստանի հետ, սակայն կշարունակի զենք մատակարարել Ուկրաինային։

Իր հերթին, Ռուսաստանի արտաքին գործերի նախարարության ներկայացուցիչ Մարիա Զախարովան կարծիք է հայտնել, որ Վաշինգտոնի կողմից Կիևին Patriot հակահրթիռային պաշտպանության համակարգերի հավանական մատակարարումը կարող է հանգեցնել ուկրաինական հակամարտությունում ԱՄՆ բանակի անմիջական մասնակցության վտանգին։