«Լուռ ու մունջ» պաշտոնյաները. ինչու է ընդհատակ անցել Զբոսաշրջության կոմիտեի նախագահ Սիսիան Պօղոսեանը

Նախորդ տարվա հունվարին ՀՀ Զբոսաշրջության կոմիտեի նախագահ նշանակվեց Սիսիան Պօղոսեանը: Նրա նշանակումը հանրությանը հրամցվեց իբրև նոր էջ Հայաստանի զբոսաշրջային քաղաքականության իրացման մեջ, բավական մեծ հույսեր էին կապվում սփյուռքում աշխատած և բավական մեծ փորձ ունեցող անձի տպավորություն թողած Պօղոսեանի հետ:

Սակայն, պետք է փաստենք, որ կոմիտեի անգործությունը չի կարող աչքի չզարնվել: Դիցուք՝ կոմիտեի ֆեսյբուքյան էջում տեղադրվում է նյութ, որում ռուս լրագրողը ներկայացնում է Հայաստանի բնության բարիքները և կիսվում  մեր երկրից ունեցած իր տպավորություններով: Ինչպես հասկանում ենք՝ դա լրագրողի անձնական նախաձեռնությունն էր և այդ նյութի ստեղծման գործում կոմիտեն որևէ ներդրում չունի, սահմանափակվել են նյութը կիսվելով: Դրանից էլ գոհ լինենք:

Այնուհետև նույն ֆեյսբուքյան էջում հանդիպում ենք Ֆլայ Առնայի չվացուցակի, գնացուցակի մասին տեղեկությունների, թե ինչու է զբոսաշրջության կոմիտեն կիսվում այդ տեղեկությամբ նույնպես դժվար է ասել, չէ որ դրա համար կա ավիափոխադրողի կայքը և կոմիտեն չէ, որ պետք է զբաղվի ավիափոխադրողի փիառով:

Այս ընթացքում կոմիտեն հասցրեց մշակել Հայաստանի զբոսաշրջային նոր բրենդը, որը, մեղմ ասած, չընդունվեց հասարակության կողմից, եղան բազմաթիվ սարկաստիկ, նույն ծաղրական մեկնաբանություններ: Ի դեպ հայտարարած մրցույթում էլ հաղթել է Aha collective խումբը։ Բանն այն է, որ այս ընկերությունը նորաբաց է, ֆեյսբուքյան էջն ունի 5 հավանում, իսկ ընկերության կայքը նոր-նոր է ձեւավորվում, եւ տարակուսանք է առաջանում, թե ինչպես է ստացվել, որ այս ընկերությունն է հաղթել։ Ավելին՝ ֆինանսավորող կազմակերպությունները նպատակահարմար չեն գտնում հանրայնացնել գումարի չափը, ինչը նույնպես հարցեր է առաջացնում:

Զբոսաշրջության կոմիտեն մի կողմից հայտարարում է Լոռիում զբոսաշրջության ոլորտի բիզնես ներկայացուցիչների, ՀԿ-ի հետ համատեղ իրականացված քննարկումների, մարզի զբոսաշրջային գրավչությանն ուղղված նախագծերի մասին, մյուս կողմից աչք է փակում այն փաստի վրա, որ նույն Լոռիում իշխանությունները ցանկանում են նոր հանքի կառուցման թույլտվություն տալ: Արդյո՞ք դա չի ազդելու մարզի զբոսաշրջային գրավչության վրա, անշուշտ ազդելու է:

Անհասկանալի է, թե ինչ է արել Կոմիտեն այս ընթացքում հայտնի իրադարձությունների ֆոնին Հայաստան տեղափոխված օտարերկրացիների ռելոկացիան կազմակերպելու համար: Վերջերս մամուլը գրել էր, որ Հայաստան ժամանած ռուսաստանցիների միայն փոքր մասն է որոշել մնալ այստեղ, իսկ սա նշանակում է, որ ռելոկացիոն ծրագրեր իրականացնողները ակնհայտորեն թերացել են իրենց աշխատանքում:

Հոկտեմբերին  ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նիստում քննարկում էր կազմակերպվել՝  ԵԱՏՄ-ում աշխատուժի ազատ տեղաշարժի հոսքերի կառավարման եւ ներուժի լիարժեք օգտագործման խնդիրների թեմայով: Սիսիան Պօղոսեանը, ով հիմնական զեկուցողներից էր, այդ նիստից ուշացել էր և այդ հանգամանքը զայրացրեց անգամ ՔՊ-ականներին, ինչին Պօղոսեանն անդրդվելիորեն արձագանքեց՝ աննորմալ պրոբկաներ էին:

Այդ իսկ նիստի ընթացքում հասկանալի դարձավ, որ Պօղոսեանը անգամ իր ձեռքի տակ եղած թվերին լավ չի տիրապետում և չի կարող բացատրել այս կամ այն  պրոցեսի տրամաբանությունը, մինչդեռ, դա նրա բուն պարտականությունն է: Դիցուք՝ ՔՊ պատգամավոր Խաչատուր Սուքիասյանը հարց էր ուղղել՝ ի՞նչն է պատճառը, որ հոկտեմբեր ամսին հյուրանոցների գները շատ բարձր են՝ 56 հազար դրամ, չէ՞ որ օգոստոսի ծանրաբեռնվածությունը չկա: Պօղոսեանը պատասխանել էր, որ հոկտեմբերի ցուցանիշները չունեն, բայց սեպտեմբերին զբոսաշրջիկների մեծ հոսք է եղել ու այդքան բարձր գները կարող են դրանով պայմանավորված լինել: Այսինքն՝ կարող են, իսկ կարող է և այլ պատճառ է, որի մասին Պօղոսեանը գաղափար չունի:

Ասել, որ կոմիտեն ընդհանրապես ոչինչ չի անում, իհարկե, չենք կարող, որոշակի գործընթացներ տեսանելի են և միայն ուրախ կլինենք, եթե դրանք տան սպասված արդյունքը, սակայն արդյո՞ք այն, ինչ այսօր արվում է, բավական է սահմանված նշաձողին հասնելու համար։ Թերևս, ոչ: