«Հայկական ժամանակ». օրը հայտնի է

Թերթը գրում է. «ՃՈ նախկին պետ, գնդապետ Մարգար Օհանյանի գործով դատական առաջին նիստը տեղի է ունենալու դեկտեմբերի 28-ին, Կենտրոն և Նորք-Մարաշ համայնքների ընդհանուր իրավասության դատարանում, Մխիթար Պապոյանի նախագահությամբ:

Այս մասին տեղեկանում ենք Դատալեքս կայքից: Դատավարությունը, փաստորեն, սկսվում է Ամանորի շեմին, երբ հանրությունը զբաղված է բոլորովին ուրիշ՝ Ամանորի հոգսերով: Մարգար Օհանյանի փաստաբան Մխիթար Վասակյանը երեկ մեր թղթակցի հետ զրույցում կտրականապես հերքել է վերը նշվածի համատեքստում տարածվող լուրերն այն մասին, թե Մարգար Օհանյանը դատարանում միջնորդելու է արագացված դատավարության կարգ կիրառել, և որ դատավարությունը հնարավոր է ավարտվի կայծակնային արագությամբ՝ մինչև Ամանոր: Նման բան հնարավոր չէ, որովհետև արագացված դատավարության կարգ կարող է կիրառվել՝ միայն եթե Մարգար Օհանյանը իրեն մեղավոր ճանաչեր: Իսկ նման բան տեղի չի ունեցել»,- ասել է Վասակյանը՝ վստահեցնելով, որ դատավարությունը շարունակվելու է սովորական ընթացակարգով և լինելու է դռնբաց»: