Մեծ Բրիտանիայի վարչապետի և արտգործնախարարի նստավայրերում կոկաինի հետքեր են հայտնաբերվել․ The Guardian

Մեծ Բրիտանիայի վարչապետի և երկրի ԱԳՆ ղեկավարի նստավայրերում կոկաինի հետքեր են հայտնաբերվել այնտեղ անցկացված խնջույքներից հետո։ Այս մասին գրում է The Guardian-ը՝ վկայակոչելով աղբյուրներին։

Մեծ Բրիտանիայի արտգործնախարարների պաշտոնական նստավայրում՝ Չիվնինգ-հաուսում աշխատող աղբյուրը հայտնել է, որ այնտեղ սպիտակ փոշի է հայտնաբերվել Մեծ Բրիտանիայի վարչապետ Լիզ Թրասի ընտրվելուց մի քանի օր առաջ։ Նշվում է, որ փոշու հետքերը երկու անգամ հայտնաբերվել են խաղասենյակում, այն երեկոներից հետո, որոնց ընթացքում Թրասը հյուրեր է ընդունել այդ նստավայրում։

Բացի այդ, The Guardian-ի աղբյուրները, որոնք աշխատել են երկրի վարչապետի պաշտոնական նստավայրում՝ Դաունինգ սթրիթում, երբ Բորիս Ջոնսոնը զբաղեցնում էր այդ պաշտոնը, ասել են, որ կորոնավիրուսի պանդեմիայի ամենաթեժ պահին այդ շենքում նույնպես երկու խնջույքներից հետո հայտնաբերվել են սպիտակ փոշու մնացորդներ։ Ընդգծվում է, որ Ջոնսոնն այդ միջոցառումներին չի մասնակցել։

Սակայն, ըստ հրապարակման, Ջոնսոնի և Թրասի կողմից թմրամիջոցների օգտագործման կամ դրանց մասին տեղյակ լինելու վերաբերյալ որևէ ապացույց չկա:

Հաղորդվում է նաեւ, որ նախկին վարչապետ Թրասի ներկայացուցիչը թերթի տեղեկությունները «կեղծ» է անվանել, իսկ Ջոնսոնի ներկայացուցիչը զարմանք է հայտնել նման հայտարարությունների կապակցությամբ։ Վարչապետի գրասենյակի ներկայացուցիչը նշել է, որ հրապարակումը չի ներկայացրել թմրամիջոցի հետքերի առկայության մասին տեղեկությունը հաստատող ապացույցներ։