Թվեր և դառը իրականություն. ինչով է աչքի ընկել տարիներ շարունակ Փաշինյանի կողմից քննադատված Ստեփան Մնացականյանը

2022 թվականի ընթացքում ստվերում գտնված պետական կառույցների շարքին անշուշտ կարելի է դասել վիճակագրական կոմիտեին: Թեև այս կառույցը իր բնույթով չպետք է գտնվի հանրության ուշադրության կենտրոնում և վերջինիս գործը այդ հանրությանը վիճակագրություն, ասել է թե՝ թվեր հրամցնելն է, սակայն անգամ այս պարագայում կառույցի պասիվությունը, ինչպես ասում են, աչք է ծակում:

Ուշագրավն այն է, որ հեղափոխությունից հետո կադրային չիստկայի ձեռնամուխ եղած Նիկոլ Փաշինյանը, ով վիճակագրական կոմիտեի երկար տարիների նախագահ Ստեփան Մնացականյանին թվեր նկարող և հայկական Այվազովսկի էր անվանում՝ պահեց իր պաշտոնում:

Արդարացրե՞ց արդյոք իրեն Մնացականյանը: Ուշագրավ է, որ այս տարվա ընթացքում կոմիտեն երկու անգամ փաստացի հերքել կամ հակասել է Փաշինյանի հնչեցրած կանխատեսումներին: Դիցուք՝ պարզվել է, որ Հայաստանի մշտական բնակչության թվաքանակը նախորդ տարի ոչ թե ավելացել է, ինչպես դա մեզ միաբերան խոստանում էին հայրենի իշխանությունները, այլ մի բան էլ պակասել է: Մյուս տհաճ իրավիճակը ստեղծվեց այն բանից հետո, երբ վիճակագրական կոմիտեն իր հնչեցրած տվյալներով ի չիք դարձրեց էկոնոմիկայի նախարարի հորդացող ներդրումների մասին միֆը:

Պասիվ 2022-ից հետո կոմիտեն որոշել է ակտիվանալ 2023-ին: Պարզվում է, որ գալիք տարի Մնացականյանի ղեկավարած կառույցը գյուղատնտեսական մարդահամար է իրականացնելու, որի ընթացքում պետք է ճշգրտվեն գյուղացիական տնտեսությունների քանակը, ունեցվածքը, ընդհանուր գյուղատնտեսական իրավիճակը։ Այս տարի էլ վիճակագրական կոմիտեն բավական կասկածելի արդյունավետության բնակաչության մարդահամար իրականացրեց, ինչի նպատակով շուրջ 1 միլիարդ դրամ հատկացվեց: Մարդահամարի անցկացման առաջին  երկու օրերի ընթացքում մի շարք քաղաքացիներ իրենց մտահոգություններն էին հայտնել անվանական տվյալների՝ այլ նպատակով հնարավոր օգտագործման վերաբերյալ: Թեև կոմիտեից շտապել էին հանգստացնել քաղաքացիներին, սակայն, ինչպես և սպասվում էր, կասկածները չփարատվեցին: 

Անգամ վարչապետ Նիկոլ Փաշինյանն է կառավարության նիստերից մեկի ընթացքում անդրադարձել վիճակագրական կոմիտեի աշխատանքին և սրտնեղել, որ առավել օպերատիվ տվյալներ են անհրաժեշտ հատկապես աղքատության աճի վիճակագրության վերաբերյալ: Ստացվում է՝ մի կողմից Փաշինյանը դժգոհ է Ստեփան Մնացականյանի օպերատիվությունից, մյուս կողմից՝ ՔՊ-ականները դեռ չեն շտապում այս կառույցը իրենցով անել..