Թուրքիան մեղադրել է Հունաստանին

Հունական ինքնաթիռները փորձել են կալանել Թուրքիայի ռազմաօդային ուժերի ինքնաթիռները, որոնք թռչում էին Էգեյան ծովի վրայով ՆԱՏՕ-ի առաքելության շրջանակներում։ Այս մասին հայտնում է Anadolu գործակալությունը՝ հղում կատարելով Թուրքիայի պաշտպանության նախարարության հայտարարությանը։

«Հունական ռազմաօդային ուժերը կրկին փորձել են Էգեյան ծովում որսալ թուրքական F-16 կործանիչները, սակայն ստացել են պատշաճ պատասխան»,- ասվում է հաղորդագրության մեջ։

Ըստ թուրք զինվորականների՝ ՆԱՏՕ-ի բոլոր երկրները, այդ թվում՝ Հունաստանը, 24 ժամվա ընթացքում տեղեկացվել են ՆԱՏՕ-ի NEXUS ACE Ege առաքելության շրջանակներում անցկացվող զորավարժությունների մասին։ Սակայն «փորձ է եղել որսալ թուրքական F-16-երը»։

Թուրքիայի պաշտպանության նախարարությունը հավելել է, որ ի պատասխան Հունաստանի գործողությունների՝ օդ են բարձրացվել Թուրքիայի ռազմաօդային ուժերի կործանիչներ։

Դեկտեմբերի 17-ին Թուրքիայի պաշտպանության նախարարությունը հայտնել էր նաև, որ Հունաստանը փորձել է որսալ թուրքական մարտական ​​ինքնաթիռները, երբ նրանք թռչում էին ՆԱՏՕ-ի առաքելության շրջանակներում։