Փաշինյանի խոստումից 4 տարի անց ԽԾԲ-ն պետական համակարգում ծաղկում է

Ազգային ժողովն առաջիկայում մի քանի դատավորներ պետք է ընտրի, թեկնածուներն արդեն հայտնի են: Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմում, Վճռաբեկ դատարանի հակակոռուպցիոն պալատի քաղաքացիական գործերի քննության դատական կազմում, ինչպես նաեւ Վճռաբեկ դատարանի հակակոռուպցիոն պալատի քաղաքացիական գործերի քննության դատական կազմում առաջադրվել են Լիզա Գրիգորյանի, Լիլիթ Խաչատրյանի եւ Արման Կուրեխյանի թեկնածությունները: Մամուլի տեղեկությունների համաձայն՝  Լիզա Գրիգորյանը մտերիմ ընկերուհի ունի ԱԺ «Քաղաքացիական պայմանագիր» խմբակցության ներսում: Խոսքն ԱԺ աշխատանքի եւ սոցիալական հարցերի մշտական հանձնաժողովի նախագահ Հերիքնազ Տիգրանյանի մասին է: Եվ հասկանալի է, որ այստեղ կա լուրջ կասկած, որ գործ ունենք հովանավորչության հետ:

Չորս տարի առաջ Նիկոլ Փաշինյանը հայտարարում էր, որ իր վարչապետության ժամանակ խնամի-ծանոթ-բարեկամ ինստիտուտը չի գործելու:

Հեղափոխությունից հետո պարզվեց, որ օրինակ՝ Հայկ Ղալումյանը  կարող է նշանակվել Տավուշի մարզպետ: Նա Նիկոլ Փաշինյանի քավորն է։ Նրա եղբայր Վահե Ղալումյանն էլ Ազգային ժողովում պատգամավոր է աշխատում` «Իմ քայլը» խմբակցությունից։

Ընկերասիրությամբ հասցրել է աչքի ընկնել Փաշինյանի ևս մեկ կադր՝ առողջապահության նախկին նախարար Արսեն Թորոսյանը: Հոգեկան առողջության պահպանման կենտրոնի նախկին տնօրեն Նարեկ Վանեսյանը, հիշեցնենք, հայտնի սկանդալից հետո հրաժեշտ տվեց պաշտոնին, իսկ այդ պաշտոնին վերջինս նշանակվել էր միայն այն պատճառով, որ հանդիսանում էր նախարար Թորոսյանի մտերիմ ընկերը: Թորոսյանի հրամանով՝ Երեւանի «Սուրբ Գրիգոր Լուսավորիչ» բժշկական կենտրոնի տնօրեն էր նշանակվել Արման Հովակիմյանը, ով նույնպես նախարարի ընկերն է:

ՀՀ վարչապետ Նիկոլ Փաշինյանի որոշմամբ՝ Սերգեյ Մեղրյանը նշանակվել է գլխավոր հարկադիր կատարող (ԴԱՀԿ պետ): Ըստ մամուլում առկա տեղեկությունների՝ վերջինս հանդիսանում է  ՀՀ ՊԵԿ նախագահ Ռուստամ Բադասյանի ընկերը։

Մամուլը նաև գրել էր, որ 2020-ի ապրիլին 37 քաղաքացի էր դիմել «Զվարթնոց» օդանավակայանի մաքսակետում աշխատանքի ընդունվելու խնդրանքով: Տեսուչ դառնալ տենչող այս 37 հոգուց ընտրել են ԱԺ «իմքայլական» պատգավար Հովհաննես Աղազարյանի որդուն՝ Վահե Աղազարյանին: Մայիսի 6-ին նրա հետ աշխատանքային պայմանագիր է կնքվել: 

Առողջապահության փոխնախարար Գեւորգ Սիմոնյանի՝ Երեւանի փոխքաղաքապետ նշանակվելուց հետո առողջապահության փոխնախարարի պաշտոնը թափուր է։ Լրատվամիջոցների տեղեկություններով, նախարար Անահիտ Ավանեսյանը պատրաստվում է այդ պաշտոնին նշանակել իր ընկերուհուն՝ առողջապահության նախարարության գլխավոր քարտուղար Վարդուհի Գրիգորյանին։ Հեղափոխությունից հետո  Նիկոլ Փաշինյանի որոշմամբ՝ Լուսինե Քոչարյանը նշանակվել էր առողջապահության նախարարության գլխավոր քարտուղար։ Համաձայն մամուլում առկա տեղեկությունների՝ վերջինիս հովանավորյալը հանդիսացել էր  ՀՀ Առողջապահության նախարարի տեղակալ Լենա Նանուշյանը, իսկ Լուսինե Քոչարյանը եղել է ԱՆ բժշկական քաղաքականության վարչության պետ, ապա աշխատակազմի ղեկավար, հետո էլ մրցույթով նշանակվել է որպես Առողջապահության նախարարության գլխավոր քարտուղար։ Սակայն, Անահիտ Ավանեսյանի նախարար նշանակվելուց հետո Նանուշյանի կադրը հեռացավ զբաղեցրած պաշտոնից և այդ պաշտոնում նշանակվեց արդեն Անահիտ Ավանեսյանի ընկերուհին՝ Վարդուհի Գրիգորյանը: