Հայտնի է՝ ինչու է ժամանակակից սմարթֆոնների մարտկոցը արագ սպառվում

DxOMark լաբորատորիայի մասնագետները մի քանի սմարթֆոնների վրա ստուգել են Always On Display ֆունկցիայի մարտկոցի սպառումը և եկել այն եզրակացության, որ այն միացնելուց հետո սարքերը 3-5 անգամ ավելի արագ են լիցքաթափվում։

Always On Display ֆունկցիան թույլ է տալիս կողպէկրանին ցուցադրել կարևոր տեղեկություններ, ինչպիսիք են ժամը, ծանուցումները և սմարթֆոնի կարգավիճակը: Թեստավորումն իրականացվել է iPhone 14 Pro Max, Google Pixel 7 Pro, Xiaomi 12S Ultra և Samsung Galaxy S22 Ultra սմարթֆոնների վրա նույն պայմաններում՝ սարքերի վրա սահմանվել է ավտոմատ լուսավորություն, անջատվել են Wi-Fi և Bluetooth մոդուլները, իսկ թռիչքի ռեժիմը ակտիվացվել է։

Այսպիսով, անջատված և միացված ֆունկցիայի դեպքում iPhone 14 Pro Max-ն աշխատել է համապատասխանաբար 466 և 122 ժամ, Google Pixel 7 Pro-ն՝ 367 և 139 ժամ, Xiaomi 12S Ultra-ն՝ 495 և 103 ժամ, Samsung Galaxy S22 Ultra-ն՝ 417 և 136 ժամ։

Միևնույն ժամանակ, փորձագետները հիշեցրել են, որ Always On Display ֆունկցիան կարող է հանգեցնել մատրիցայի այրման, ինչի պատճառով՝ էկրանին կարող է դիտվել «հետպատկերի» էֆեկտը։